सक्रिय पत्रकार नै संक्रमित भएपछि कन्ट्याक्ट ट्रेसिङ जटिल

वीरगन्ज- वीरगन्जमा सक्रिय केही पत्रकार कोरोना भाइरसबाट संक्रमित देखिएपछि कन्ट्रयाक्ट ट्रेसिङमा समस्या उत्पन्न भएको छ। बन्दाबन्दी भए पनि पत्रकार समाचार संकलनका कार्यक्रममा आफू सुरक्षित रहेर विभिन्न ठाउँमा पुग्नु स्वाभाविकै हो।

मंगलबार संक्रमण पुष्टि भएका एक पत्रकार जिल्लास्तरीय विपत् व्यवस्थापन समितिको बैठकमा सहभागी भएका थिए भने उनले सुरक्षा निकायका उच्च अधिकारीसँग पनि भेट गरेका थिए।

त्यस्तै आइतबार सञ्चारकर्मीमाथि प्रहरीले गरेको हातपातमा पनि ती पत्रकार संलग्न थिए। यसै विषयमा पर्साका प्रहरी उपरीक्षक गंगा पन्तले चासो नदिएपछि उनले प्रदेश २ का डीआईजी धीरजप्रताप सिंहलाई भेटेर घटनाबारे जानकारी गराएका थिए।

ती पत्रकार वीरगन्ज महानगरपालिकाले बोलाएको सर्वदलीय बैठकमा पनि उपस्थित रहेको बताइएको छ। संक्रमित धेरै ठाउँमा गएकाले कन्ट्याक्ट टेसिङ गर्न समस्या परेको नारायणी अस्पतालका चिकित्सक डा. निरज सिंहले बताए।