काठमाडौं - सर्वोच्च अदालतले खोप अभियान नरोक्न आदेश दिएको छ। कोरोना भाइरस संक्रमणको जोखिम बढेपछि स्वास्थ्य मन्त्रालयले चैत मसान्तसम्मका लागि दादुरा खोप अभियान स्थगित गरेको थियो।
न्यायाधीश बमकुमार श्रेष्ठको एकल इजलासले राष्ट्रिय दादुरा खोप अभियान तत्काल सञ्चालन गर्न आदेश दिएको हो।
खोप रोक्दा बालबालिकाको स्वास्थ्यमा असर पर्ने भन्दै अधिवक्ता सन्तोष भण्डारी लगायतले रिट निवेदन दर्ता गरेका थिए ।
सर्वोच्चले भनेको छ, ‘खोप अभियान सञ्चालन नगर्दा बालबालिकाको स्वास्थ्यमा पर्न जाने प्रतिकूल प्रभावसमेतलाई विचार गर्दा खोप अभियानलाई सुरक्षित साथ सञ्चालन गर्नू गराउनू।’