कपिलवस्तु- सोमबार कोरोना संक्रमण पुष्टि भएका दशै जना लकडाउनका बेला प्रहरीको आँखा छलेर भारतबाट नेपाल प्रवेश गरेको खुलेको छ ।
उनीहरु भारतको मुम्बईबाट लुकिलिपी मध्यरातमा १२ दिनअघि नेपाल प्रवेश गरेको कपिलवस्तुका प्रमुख जिल्ला अधिकारी दिर्घनारायण पौडेलले नेपाल समयलाई जानकारी दिए । यसअघि भेटिएका दुई संक्रमित पनि भारतको मुम्बईबाट नेपाल प्रवेश गरेको खुलेको थियो ।
उनका अनुसार सबै संक्रमित भारतबाट नेपाल प्रवेश गरेको जानकारी पाउने वित्तिकै प्रकाउ गरि क्वारेन्टिनमा राखिएको थियो । त्यहाबाट शनिबार ३ सय जनाको थ्रोट स्वाब संकलन गरि पठाएकोमा दश जनामा कोरोना पोजिटिभ देखिएको हो ।
संक्रमित १० जना मध्ये ८ जना यशोधरा गाउँपालिका वडा ५ का र २ जना बुद्धभूमि नगरपालिका वडा नम्बर १ र १० का रहेको स्वास्थ्य मन्त्रालयले जनाएको छ । संक्रमण पुष्टि भएकाहरु १८, १९, २०, २०, २४, ३०, ३१, ३४, ३४ वर्षका पुरुष र एक जना उमेर खुलेको छैन ।
स्थानीय प्रशासन र स्थानीय सरकारको सहयोगमा स्वास्थ्यकर्मीले शनिबार यशोधरा गाउँपालिकाबाट ६२ बुद्धभूमि नगरपालिबाट १२० र कपिलवस्तु नगरपालिकाका १ सय जनाको स्वाब संकलन गरी काठमाडौं टेकुस्थित जनस्वास्थ्य प्रयोगशालामा पठाइका थिए । यी मध्ये धेरेको रिपोर्ट आउन बाँकी छ ।
स्वाव संकलन गरिएका मध्ये अधिकांश भारतबाट लुकिछिपी नेपाल आएकाहरु छन् । प्रमुख जिल्ला अधिकारी पौडेलका अनुसार भारतबाट लुकिछिपी नेपाल प्रवेश गरेकाहरुबाट जोखिम बढ्दै गएको छ । अहिले पनि लुकिछिपी भारतीय सीमा नाकाबाट नेपाल प्रवेश गर्ने क्रम रोकिएको छैन् ।
लुकीछिपी नेपाल छिर्ने क्रम बढेपछि स्थानीय प्रशासनले सीमामा निगरानी बढाएको छ । प्रत्येक तीन सय मिटरमा सीमा सुरक्षामा खटिएका प्रहरीको अस्थायी पोस्ट राखेर सुरक्षा दिएको प्रमुख जिल्ला अधिकारी पौडेलले जानकारी दिए ।
उनका अनुसार पछिल्लो पाँच दिनमा मात्रै भारतबाट नेपाल प्रवेश गर्न खोज्ने २ हजार १ सय ब्यक्तिलाई प्रहरीले नियन्त्रणमा लिएको छ । उनीहरुलाई दशगजा क्षेत्रमा राखिएको छ ।