जर्मन फुटबल लिग बुन्डेलिगा–२ मे १६ मा सुरु गर्ने तयारी गरिएको छ। तर, प्रतियोगितामा सहभागी क्लब डायनामो ड्रेसडेनका खेलाडी साता अघिबाट आइसोलेसनमा बसेका छन्।
क्लबका दुई खेलाडीलाई कोरोना संक्रमण पुष्टि भएपछि क्लबले सबै खेलाडीलाई आइसोलेसनमा राखेको हो। प्रशिक्षणमा सहभागी भएका प्रशिक्षक र ग्राउन्ड स्टाफलाई पनि आइसोलेसनमा राखिएको क्लबले बताएको छ।
जर्मन फुटबल संघ (डीएफबी)ले बुन्डेलिगा–२ सँगै बुन्डेसलिगा यहीँ मे १६ बाट सुरु हुने तयारी गरिरहेको छ।
बुन्डेसलिगा कोरोनापछि सुरु हुने पहिलो युरोपियन लिग हुनेछ। “सत्य यो हो की– अबको १४ दिन हामी न प्रशिक्षण गर्छौं न खेलमा उपस्थित हुन्छौं,” उसले भनेको छ।
गत बिहीबार डीएफबीले बाँकी सिजन स्वास्थ्यलाई मुख्य प्राथमिकतामा राखेर सञ्चालन गरिने बताएको थियो।
प्रतियोगितामा दर्शकको उपस्थितिमाथि पूर्ण बन्देज लगाइएको छ। त्यस्तै, मैदानमा तीन सय जनासम्म मानिस उपस्थित हुन सक्ने डीएफबीले बताएको छ। त्यसमा खेलाडी, स्टाफ, कोचलगायत पर्छन्।
एजेन्सी