काठमाडौं- पेरु क्रान्तिका नेता अभिमाइन गुजमान (गोन्जालो)को ८६ वर्षको उमेरमा निधन भएको छ। उनी जेलमै रहेको अवस्थामा निधन भएको हो। उनी सन् १९९२ देखि जेलमा थिए। आतंक फैलाएको आरोपमा उनलाई सरकारले आजीवन कारावासको सजायँ दिएको थियो। दार्शनिक नेता गोन्जालो विश्वभरका कम्युनिष्ट क्रान्तिकारीका प्रेरणाका स्रोत मानिन्छन्।
सन् १९३४ मा पेरुको दक्षण तटमा अवस्थित मोलेन्डो शहरमा उनको जन्म भएको थियो। सन् १९९० को दशकमा पेरु कम्युनिष्ट पार्टी (साइनिङ पाथ)का अध्यक्ष गोन्जालोको नेतृत्वमा सशस्त्र जनयुद्ध सुरु भएको थियो। गाउँदेखि शहर घेर्ने रणनीति अन्तर्गत सो क्रान्तिले पेरुका अधिकांश गाउँ र केही मुख्य शहरहरुसमेत कब्जा गरेको थियो। साइनिङ पाथ राजधानी लिमासहित केन्द्रीय सत्ता पनि कब्जा गर्ने उद्देश्यको नजिक पुगिसकेको थियो।
यसैक्रममा सन् १९९२ सेप्टेम्बर १२ तारिखका दिन राजधानी लिमा शहरको एक घरबाट गोन्जालो पक्राउ परे। उनलाई सैनिक जेलमा थुनेर आजीवन काराबासको सजायँ सुनाइयो। दोस्रो र तेस्रो तहसम्मका नेताहरु पनि पक्राउ परेका थिए। सन् १९८१ बाट सुरु भएको पेरुको कम्युनिष्ट क्रान्तिले गम्भीर धक्का खायो। सन् १९९५ सम्म केन्द्रीय सत्ता कब्जा गरेर नयाँ जनवादी क्रान्ति सम्पन्न गरिसक्ने योजना सफल हुन सकेन।