जनकपुरधाम– लकडाउन लम्बिँदै जाँदा समस्यामा परेका गरिब तथा विपन्नलाई प्रदेश २ सरकारले राहत वितरण कार्य सुरु गरेको छ । पहिलो चरणमा स्थानीय तहमार्फत् राहत वितरण गरेको प्रदेश सरकारले दोस्रो चरणमा वडा कार्यालयमार्फत प्रभावितहरुलाई राहत पुर्याउन सुरु गरेको हो ।
यसअघि स्थानीय तहमार्फत राहत वितरण गर्दा प्रदेशको विभिन्न स्थानमा विवाद र झडपसमेत हुँदा दोस्रो चरणमा प्रदेश सरकारले वडा कार्यालयमार्फत गरिब तथा विपन्नलाई राहत वितरण गर्ने निर्णय गरेको छ ।
यसैक्रममा प्रदेश सरकारले पठाएको राहत सामग्री शनिबार जनकपुरधाम उपमहानगरपालिका–५ मा वितरण गरिएको छ । वडाका ६० घरधुरीलाई प्रदेश सरकारमार्फत आएको राहत समाग्री वितरण गरिएको वडाध्यक्ष मनोज साहले जानकारी दिएका छन् ।
प्रतिपक्षी दल नेपाली कांग्रेसका संसदीय दलका नेता रामसरोज यादवको उपस्थितिमा गरिब तथा विपन्न परिवारलाई राहत समाग्री वितरण गरिएको वडाध्यक्ष साहले बताए ।
प्रदेश सरकारको उद्योग, पर्यटन, वन तथा वातावरण मन्त्रालयमार्फत प्रति परिवारको लागि प्राप्त भएको चामल २५ केजी, मसुरो दाल २ केजी, खाने तेल एक लिटर, सोयाबिन पाँच सय ग्राम र हात धुने साबुन राहत वितरण समितिको रोहबरमा वितरण गरिएको उनले जानकारी दिए ।
यसअघि उपमहानगरपालिकाले प्रति परिवार १५ केजी चामललगायतको राहत समाग्री वितरण गरेको थियो । स्थानीय तहहरुले वडा कार्यालयहरुले उपलब्ध गराएको गरिब तथा विपन्नहरुको तथ्यांकअनुसार खाद्यान्नलगायतका राहत सामग्री वितरण गरेको थियो ।