सुदूरपश्चिमका सबै कोरोना संक्रमित संक्रमणमुक्त

धनगढी– सुदूरपश्चिमका सबै कोरोना संक्रमित उपचारपछि निको भएर घर फर्केका छन्। आज धनगढी-५ की ३४ वर्षीया कोरोना संक्रमित एक महिला सेती प्रादेशिक अस्पतालबाट डिस्चार्ज भएसँगै सुदूरपश्चिममा भेटिएका पाँचै जना कोरोना संक्रमित ठिक भएका हुन्।

लगातार दुई पटकसम्म रिपोर्ट नेगेटिभ आएपछि विगत ३५ दिनदेखि उपचाररत उनलाई डिस्चार्ज गरिएको सेती अस्पतालका कोरोना रोग उपचार विभाग प्रमुख डा शेरबहादुर कमरले जानकारी दिए। उनको यसअघि ६ वटा रिपोर्ट पोजेटिभ आएका थियो। लामो समयको उपचारपछि घर फर्कन पाउँदा उनले खुसी व्यक्त गरिन्।

यसअघि लम्कीचुहा नगरपालिकाका २१ वर्षीय पुरुष, धनगढी उपमहानगरपालिकाका ३४ वर्षीय पुरुष, कञ्चनपुरको बेदकोट नगरपालिकाका ४० वर्षीय पुरुष र लम्कीचुहा नगरपालिकाकी महिला अस्पतालबाट डिस्चार्ज भइसकेका छन्।