राष्ट्रियसभामा तीन अध्यादेश पेश

काठमाडौं - राष्ट्रियसभामा बैठक प्रारम्भ भएकै दिन आज तीन अध्यादेश पेश गरिएको छ। प्रधानमन्त्रीका तर्फबाट गृहमन्त्री रामबहादुर थापाले 'संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) अध्यादेश २०७७' र 'राजनीतिक दलसम्बन्धी (दोस्रो) अध्यादेश, २०७७' पेश गरे। त्यस्तै कानून, न्याय तथा संसदीय मामिलामन्त्री शिवमाया तुम्वाहाङ्फेले बैठकमा 'केही अध्यादेश खारेज गरी नेपाल ऐनको साविकको व्यवस्था जगाउने अध्यादेश, २०७७' पेश गरिन्।

शोक प्रस्ताव

वैठकले पहिलो संविधानसभा सदस्य प्रा डा विश्वनाथप्रसाद अग्रवाल र शिवनारायण उराँवको निधनमा शोक प्रस्ताव पारित गरेको छ। नेपाली जनता दलका तर्फबाट संविधानसभा सदस्य अग्रवालको ७५ वर्षका उमेरमा गत फागुनमा निधन भएको थियो। नेपाली कांग्रेसका तर्फबाट संविधानसभा सदस्य रहेका उराँवको ६१ वर्षका उमेरमा केहि दिन अघि निधन भएको थियो।

राष्ट्रियसभाको अर्को बैठक वैशाख २८ गते दिउँसो १ बजे बस्ने छ।