दिदीको हत्या गर्न भिनाजुलाई उक्साएको आरोपमा बहिनी पक्राउ

काठमाडौं- दिदीको हत्या गर्न भिनाजुलाई उक्साउने बहिनी पक्राउ परेकी छन्। दिदीको हत्या गर्न उक्साउने गंगा लामालाई धनुषा प्रहरीले शुक्रबार पक्राउ गरेको हो।

मिथिला नगरपालिका ९ लालभट्टीका २८ वर्षीय हरि चौहानले साली गंगासँग बिहे गर्नका लागि पत्नी वीणाको हत्या गरेको खुलेपछि वीणाकी कान्छी बहिनी गंगालाई पक्राउ गरिएको प्रहरीले जनाएको छ।

हरिले साली गंगासँग विवाह गर्न पत्नी वीणाको हत्या गरेको बयान दिएका छन्। सोही आधारमा गंगालाई पक्राउ गरिएको इलाका प्रहरी कार्यालय ढल्केबरका इन्चार्ज प्रहरी निरीक्षक तीर्थ कार्कीले जानकारी दिए। हरि भने यसअघि नै पक्राउ परिसकेका छन्।

प्रहरीका अनुसार वैशाख १८ गते वीणाको शव लालगढ सामुदायिक वनमा गाडिएको अवस्थामा फेलापरेको थियो। पत्नी घरबाट निस्केपछि सम्पर्कमा नआएको भन्दै हरिले प्रहरीलाई खबर गरेका थिए।

हरिमाथि शका लागेर वीणाका बुबा पदमबहादुरले प्रहरीमा उजुरी दिए। प्रहरीले हरिलाई नियन्त्रणमा लिएर अनुसन्धान थाल्दा कान्छी साली गंगासँग विवाह गर्न पत्नीको हत्या गरेको स्वीकारेका थिए।

दिदीको हत्या गर्न बहिनी गंगाले नै उक्साएको भन्दै उनका बुबाले प्रहरीमा जाहेरी दिएको प्रहरी निरीक्षक कार्कीले बताए। टिपर चालक हरिले ५ वर्षअघि पदमबहादुरकी माइली छोरी वीणा लामासँग प्रेमविवाह गरेका थिए। यी दम्पतीका एक छोरा र एक छोरी छन्। 

हरिसँगै गंगाविरुद्धसमेत कर्तव्य ज्यान मुद्दामा अनुसन्धान थालिएको प्रहरीले जनाएको छ।

याे पनि पढ्नुस् :

पत्नीको हत्या गरी शव खाल्डोमा, प्रहरीमा हराएको उजुरी