काठमाडौं- नर्वेजियन फरवार्ड इलिङ हाल्यान्डले दोहोरो गोल गरेससँगै जर्मन फुटबल लिग बुन्डेसलिगामा बोरुसिया डर्टमन्डले जित निकालेको छ।
बायर लिभरकुसनको घरेलु मैदानमा भर्खरै सम्पन्न खेलमा पाहुना टिम डर्टमन्डले ४–३ गोलको रोमाञ्चक जित निकालेको हो।
डर्टमन्डका लागि हाल्यान्डबाहेक जुलियन ब्रेन्डिक्ट र रोपेल गुरेइरोले समान १–१ गोल गरे। यता लिभरकुसनका लागि फ्लोरियन विज, प्याट्रिक सिक र मोउसा डियबीले समान १-१ गाेल गरे।
खेलको नवौं मिनेटमा गोल गर्दै लिभरकुसनका फ्लोरियन विजले अग्रता दिलाएका थिए। तर ३७औं मिनेटमा हाल्यान्डले गोल गर्दै खेल बराबरी गरे। तर पहिलो हाफको इन्ज्युरी समयमा प्याट्रिक सिकले गोल गर्दै पहिलो हाफमा घरेलु टिमले २–१ गोलको अग्रता बनायो।
दोस्रो हाफको ४९औं मिनेटमा ब्रेन्डिक्टले गोल गरेर खेललाई बराबरीमा ल्याए पनि ५५औं मिनेटमा लिभरकुसनका मोउसा डियबीले गोल गर्दै फेरि लिभरकुसनलाई अग्रता दिलाए।
त्यसपछि डर्टमन्डले दुई गोल गरेको थियो। गुरेइरोले ७१औं मिनेटमा गोल गरे भने हाल्यान्डले ७७औं मिनेटमा गोल गर्दै नतिजालाई ४–३ बनाए।
यो जितसँगै डर्टमन्ड जर्मन लिगको दोस्रो स्थानमा उक्लिएको छ। उसले चार खेलबाट ९ अंक बनाएको छ। यता शीर्षस्थानको उल्भ्सबर्गले चार खेलमा शतप्रतिशत जित निकालेको छ। त्यस्तै, पराजित लिभरकुसन भने सात अंकका साथा पाँचौ स्थानमा छ।