मंगलबार, असार २३, २०७७

समाचार अर्थ

प्रदेश ५ मा साढे ४७ प्रतिशत रोपाइँ सकियो

1593437887ropai1.jpg
रुपन्देहीको सुपौलीमा धान रोपाइँ गर्दै प्रदेश ५ को कृषि तथा सहकारी मन्त्री आरती पौडेललगायत । तस्बिर सौजन्य : ज्ञानु पौडेल

भैरहवा- प्रदेश ५ मा ४७ प्रतिशत रोपाइँ सकिएको छ। कृषि विकास मन्त्रालयका सूचना अधिकारी भीमनाथ शर्माका अनुसार १२ जिल्लामा गरी ४७.५० प्रतिशत रोपाइँ भएको छ।

प्रदेश ५ का मुख्यमन्त्री शंकर पोखरेलले धान उत्पादनमा वृद्धि, आत्मनिर्भरता र समृद्धिको नाराका साथ मनाउन लागिएकोे धान दिवसले किसानलाई हौसला मिलेको बताएका छन्।

उनले विज्ञप्तिमार्फत भनेका छन्, ‘कृषिबाट प्राप्त हुने कुल गार्हस्थ उत्पादनमा धानको योगदान २० प्रतिशतत छ। नेपालमा खेती गरिने कुल क्षेत्रफलको ४७.५ प्रतिशत जमिनमा धानखेती हुँदै आएकोमा क्षेत्रफल र उत्पादनमा तराई क्षेत्रको हिस्सा ७० प्रतिशतभन्दा बढी छ। हाम्रो प्रदेश धान उत्पादनमा पहिलो स्थानमा छ।’

प्रदेश ५ सरकारले आगामी वर्षको बजेटमा कृषिको व्यावसायीकरणमार्फत प्रदेशमा ४२ हजारलाई रोजगारी सिर्जना गर्ने लक्ष्य राखेको छ।

सिँचाइ अभावका कारण पहाडी क्षेत्रका किसान आकाशेपानीको भरमा खेती गर्न बाध्य छन्। तराईमा अव्यवस्थित बसोबासीले कृषि क्षेत्र मरुभूमि बन्दै गएको छ।

गत वर्ष ३ लाख ३० हजार ८ सय ८१ हेक्टर क्षेत्रफलमा धानखेती भएको प्रदेश ५ मा यस वर्ष उक्त क्षेत्रफल बढ्ने देखिएको छ।

विगतका वर्षमा गाउँमा खेतीपाती गर्ने जनशक्तिको कमी हुने गरेकोमा यस वर्ष कोभिड १९ का कारण युवा पुस्ता गाउँ फर्किएकाले उक्त समस्या भने टर्ने देखिएको छ ।

नेपालमा १५ लाख ५२ हजार ४ सय ६९ हेक्टर क्षेत्रफलमा धान उत्पादन हुन्छ। जसमध्ये प्रदेश नं. ५ मा मात्रै ३३ हजार ४ सय २६ हेक्टर क्षेत्रफलमा धान उत्पादन हुन्छ।

प्रदेश ५ मा १२ लाख ७४ हजार २ सय ६८ मेट्रिकटन धान उत्पादन हुन्छ । प्रदेश ५ मा ६ लाख ९७ हजार ३ सय ३३ खेतीयोग्य जमिन छ।

संघीय सरकारले पहिलो पटक धान रोप्नुभन्दा पहिले समर्थन मूल्य तोकेर किसानलाई उत्साहित बनाएको छ। मोटा धानको समर्थन मूल्य प्रतिक्विन्टल २७ सय ३५ रुपैयाँ र मध्यम खालको धान मूल्य प्रतिक्विन्टल २८ सय ८५ रुपैयाँ तोकेको हो।

कृषि तथा पशुपन्छी विकासमन्त्री घनश्याम भुसालले संरक्षित कृषि, सुनिश्चित बचतको अभियानअन्तर्गत रोप्नुअघि धानको समर्थन मूल्य तोकिएको बताए ।

प्रदेश ५ को कृषि तथा सहकारी मन्त्री आरती पौडेलले कृषिको व्यवसायीकरणमा सहकारीको सहभागितामा जोड दिएकी छन्।

जनउत्थान सहकारी रुपन्देहीले सुपौलीमा आयोजना गरेको धान रोपाइँ कार्यक्रममा सहभागी भएर धान रोप्दै उनले सहकारीको सहभागिताले नै कृषिको व्यासायीकरण सम्भव भएको बताइन्।

 

 

प्रतिक्रिया दिनुहोस्