स्वास्थ्यकर्मीलाई प्रोत्साहन भत्ता र बिमा सुनिश्चित गर्न माग

नेपालगन्ज– कोरोना भाइरस (कोभिड–१९) रोकथाम र नियन्त्रणमा खटिएका स्वास्थ्यकर्मीहरूलाई प्रोत्साहन भत्ता र बिमाको सुनिश्चित गर्न माग गरिएको छ।

नेपाल निजामती कर्मचारी संगठन, जिल्ला कार्यसमिति बाँकेको बुधबार बसेको आकस्मिक बैठकले यस्तो माग गरेको हो। सचिव देविलाल चौलागाईका अनुसार बैठकले परीक्षणको दायरा बढाउँदै संक्रमण फैलिएको क्षेत्र र कन्ट्याक्ट ट्रेसिङ गरी सम्पर्कमा आएका सबैको यथाशीघ्र परीक्षण गरिनुपर्ने मागसमेत गरेको छ।

बैठकले नियन्त्रणमा खटिएका स्वास्थ्यकर्मीहरूलाई पीपीईसहित सबै स्वास्थ्य सुरक्षा सामग्रीको व्यवस्था गरिनुपर्ने तथा बिरामीको सम्पर्कमा आएका स्वास्थ्यकर्मी र कर्मचारीहरूको परीक्षण गर्नुपर्ने माग गरेको छ।

‘भिडियो कन्फरेन्स’मार्फत भएको बैठकले जिल्ला प्रशासन कार्यालयलगायत सम्बन्धित निकायसँग छलफल र समन्वय गरी राहत, उपचारका साथै अन्य के–कस्तो सहयोग गर्न सकिन्छ भन्ने बारेमा छलफलपछि निर्णय गर्ने जनाएको छ।

यस्तै, बैठकले महामारीको बेला धैर्य एवं संयम रहन र सरकार तथा स्थानीय प्रशासनद्वारा जारी आदेश र निर्देशनको पूर्ण पालना गर्न आमनागरिकमा अनुरोधसमेत गरेको छ।