विराटनगर- काेसी अस्पतालमा उपचार गराइहेका काेराेना भाइरसका ६ जना संक्रमित निकाे भएर डिस्चार्ज भएका छन्। उपचार गराइरहेका ३१ मध्ये छ आज ६ जना निको भएका हुन्।
धार्मिककार्य गर्न भारतबाट १३ जनाको जमात (समूह) बनाएर आएका ती जमाती (समूह सदस्य) लाई कोरोनाको सङ्क्रमण देखिएपछि प्रदेश सरकारले विशेष सुरक्षासहित कोसी अस्पताल काेराेना उपचार केन्द्र विराटनगरमा ल्याएको थियो। उनीहरुलाई वैशाख ५ र ६ गते उदयपुर जिल्लाको भुल्केबाट ल्याइएको थियो।
प्रदेश नं १ मा पहिलोपटक यति धेरै सङ्ख्यामा कोराना सङ्कमित देखिएपछि प्रदेश सरकारले सङ्क्रमण बढ्न नदिन लकडाउनलाई निकै कडा बनाएको छ। उनीहरु सबै भारतीय नागरिक हुन् ।
घर फर्कनेहरुमा ३० वर्षीय अनुस जैदी, २९ वर्षीय मोहम्मद अजिज, २८ वर्षीय मोहम्मद जावेद, २१ वर्षीय मोहम्मद अहमद साहेव, ३४ वर्षीय मोहम्मद अजिरवान र २६ वर्षीय मोहम्मद रासिद छन्।
प्रदेश नं १ का सामाजिक विकासमन्त्री जीवन घिमिरेले स्वास्थ्य सेवा निर्देशनालय, मन्त्रालय, अस्पतालको संयुक्त कार्यको सफलतास्वरुप पहिलो चरणमा संक्रमित निको भइ निस्कने लागेकामा खुसी व्यक्त गरे। उनले भने, 'यो प्रदेश सरकारको कोरोना उपचारमा ठूलो सफलता हो। मन्त्री घिमिरेले प्रदेशमा रहेका तीन पिसीआर परीक्षणका लागि तीन हजार र १४ जिल्लामा द्रुत परीक्षणका किट (आरडिटी) लागि सात हजार व्यवस्था गरिएको बताए।
कोसी अस्पतालका मेडिकल सुपरिटेन्डेन्ट डा संगीता मिश्राले निको भएर घर जान लागेका पूर्व संक्रमितले केन्द्रमा रहँदा सहयोगी रहेको बताउँदै केन्द्रमा रहेका अन्यको आगामी हप्ता स्वाब परीक्षण गर्ने जानकारी दिइन्। केन्द्रका व्यवस्थापक ज्ञानबहादुर बस्नेतले केन्द्रका स्वास्थ्य उपचार सामग्रीको कुनै अभाव नरहेको बताए ।अहिले केन्द्रमा २५ जना उपचारमा छन्।