बाराको बिश्रामपुरमा आफ्नै खेतमा काम गरिरहेका नेपालीमाथि भारतीय सीमा सुरक्षा बल (एसएसबी) ले कुटपिट गरेका छन्। बिश्रामपुर गाउँपालिका–४ बलिरामपुरमा खेतमा काम गर्न गएका नेपालीलार्ई एसएसबीले कुटपिट गरेको नेपाल प्रहरीले जनाएको छ।
बाराका प्रहरी प्रमुख एसपी कृष्ण पंगेनीले एसएसबीका जवानहरुले नेपाली भूमिमै आएर कुटपिट गरेको बताए।
पंगेनीका अनुसार एसएसबीले नेपालीमाथि दुर्व्यवहार गर्न थालेपछि स्थानीय प्रतिकारमा उत्रेका थिए। त्यसपछि भारतीय सर्वसाधारण पनि लाठी, भाटा बोकेर प्रतिकारमा उत्रिँदा स्थिति तनावपूर्ण बनेको थियो।
‘सोमबार नेपाली एक जना भारतमा रहेका आफन्तलाई तरकारी पुर्याउन जाने क्रममा एसएसबीसँग विवाद भएको रहेछ,’ पंगेनीले भने, ‘त्यही विषयलाई इगो बनाएर आज नेपालीमाथि कुटपिट गरेछन्।’
वडाध्यक्ष मदन प्रसाद यादवले झडपमा अशोक कुमार साह, कमलेश शर्मा, हिरालाल शर्मा, दीपक शर्मा, छोटेलाल साह, मदन साहलगायतका घाइते भएको जानकारी दिए।
अशोकको टाउकोमा चोट लागेको र अन्यको अवस्था सामान्य रहेको यादवले बताए। सशस्त्र प्रहरी बलको पहलमा स्थिती नियन्त्रणमा आएको यादबले सुनाए।