जनकपुरधाम- दुई दिनदेखि धनुषा सीमाको नाकामा अलपत्र २४ जना नेपालीलाई भारततर्फै फिर्ता पठाइएकाे छ। भारतका विभिन्न स्थानबाट घर नेपाल लागेका उनीहरु दुई दिनदेखि दसगजा क्षेत्रमा अलपत्र थिए। काेराेना भाइरस संक्रमण जाेखिमका कारण उनीहरूलाई उतै पठाइएकाे छ।
धनुषाको महिनाथपुर सीमाको दसगजामा १३ र इनर्वा सीमाको दसगजामा ११ नेपालीलाई सशस्त्र प्रहरीले रोकेको थियो। उनीहरुलाई मंगलबार भारतीय प्रहरीमार्फत उतै पठाइएको सशस्त्र प्रहरी उपरीक्षक राजेश उप्रेतीले जानकारी दिए।
जो जहाँ छन् त्यहीं राख्नुपर्ने माथिल्लो तहको आदेशअनुसार उनीहरुलाई भारत फर्काइएको सशस्त्र प्रहरी उपरीक्षक उप्रेतीले बताए। ‘महिनाथपुर दसगजामा रहेका १३ जनालाई एसएसबीको सहयोगले भारतफर्त पठायौं,’ उनले भने, ‘तर, उताको क्वारेन्टाइनले सायद राख्न मानेको छैन। उनीहरु फेरि नाकातर्फ आएको बुझिएको छ।’
इनर्वा सीमाबाट पठाइएका ११ जनालाई विहार मधुबनी जिल्लाको जयनगरस्थित क्वारेन्टाइनमा राखिएको छ। इनर्वा नाकामा मंगलबार पुनः भारतबाट आएका ६०/७० जना नेपालीलाई नेपाल प्रवेशमा सशस्त्र प्रहरीले रोक लगाएको छ। भारतका विभिन्न स्थानबाट आएका उनीहरुलाई पनि फेरि उतै पठाइएको सशस्त्र प्रहरी उपरीक्षक उप्रेतीले जानकारी दिए।