झापा फुटबल क्लबविरुद्ध एमयुएफसी विजयी

काठमाडौं- सहिद स्मारक 'सी' डिभिजन छनौट खेलमा झापा फुटबल क्लबविरुद्ध एमयुएफसी विजयचोक युवा क्लबले जित हासिल गरेको छ। शुक्रबार एन्फा कम्प्लेक्समा भएको खेलमा ७५औँ मिनेटमा एमयुएफसीका सञ्जीव विष्टले गोल गर्दै टिमलाई अग्रता दिलाएका थिए। 

यसपछि कुनै पनि टिमले खेल अवधिमा गोल गर्न नसकेपछि एमयुएफसी ०-१ ले विजयी घोषित भएको थियो। खेलमा एमयुएफसीकै गोलकिपर राजीव लामा 'म्यान अफ द म्याच' घोषित भए। 

यसअघि बुधबार भएको खेलमा एमयुएफसीले साथी समूहलाई पराजित गरेको थियो। दुवै खेलमा अपराजित एमयुएफसी छनौट खेलको समूह 'एल'मा छ। छनौटमा ७८ टिमको सहभागिता छ।

म्यान्चेस्टर युनाइटेड फुटबल क्लबका नेपाली फ्यानले एमयुएफसी विजयचोक युवा क्लब बनाएका हुन्। क्लबले पहिलो पटक सी डिभिजन छनौट खेलिरहेको हो।