धनुषा - श्रीमती हत्याको आरोपमा प्रहरीले एकजनालाई पक्राउ गरेको छ। २३ वर्षीया श्रीमती बिनु चौहान लामाको हत्या गरेको अभियोगमा प्रहरीले मिथिला नगरपालिका–९ लालभित्ती बस्ने हरि चौहानलाई आइतबार पक्राउ गरेको हो।
झगडा गरी घरबाट हिँडेकी बिनु सम्पर्कमा नआएको भनी हरिले शुक्रबार प्रहरी चौकी लालगढमा मौखिक जानकारी गराउनासाथ प्रहरीले बिनुको खोजी तथा अनुसन्धान सुरु गरेको थियो। सो क्रममा सोही नगरपालिका-१० लालगढस्थित सामुदायिक वनको मगरनी खोल्सामा हत्या गरेर गाडेको भन्ने जानकारी प्राप्त हुनासाथ ईलाका प्रहरी कार्यालय ढल्केवर र प्रहरी चौकी लालगढबाट खटिएको प्रहरीले उक्त स्थानमा उत्खनन् गर्दा बिनुको शव फेला पारेको थियो।
घटनाको प्रारम्भिक अनुसन्धानको क्रममा हरिले नै हत्या गरेको खुलेपश्चात उनलाई प्रहरीले पक्राउ गरेको हो। यस सम्बन्धमा प्रहरीले थप अनुसन्धान गरिरहेको बताएको छ।