काठमाडौं- लकडाउन उल्लंघन गर्दै घरबाहिर निस्किएका ११ सय ३३ जनालाई सोमबार बिहान प्रहरीले पक्राउ गरेको छ ।
एकै दिनमा १६ जना कोरोना संक्रमित भेटिएपछि लकडाउनमा थप कडाइ गरेको प्रहरीले काठमाडौं उपत्यकाका विभिन्न स्थानबाट सडकमा निस्किएका उनीहरुलाई पक्राउ गरेको हो ।
पक्राउ पर्नेमा २ सय ८६ महिला र ८ सय ४७ जना पुरुष रहेका छन् । पक्राउ परेकाहरुलाई दुई घण्टा सडकमै राखेर कोरोना सचेतना कक्षा दिइएको महानगरीय प्रहरी प्रमुख विश्वराज पोखरेलले जानकारी दिए ।
सरकारले लकडाउन घोषणा गरेको चैत ११ गतेपछि प्रत्येक दिन २५ सयभन्दा बढी मानिस कारबाहीमा पर्ने गरेका छन्। लकडाउनका बेलामा पनि तरकारी, दुध किन्ने बाहानामा घर बाहिर निस्किनेहरुको संख्या बढ्दै गएको छ ।
त्यस्तै लकडाउनको समयमा पास नै नलिई सवारी चलाएको भन्दै प्रहरीले सोमबार बिहान ६८ वटा सवारी नियन्त्रणमा लिएको छ ।
यसैगरि काठमाडौं उपत्यका प्रवेश गर्ने नाकामा प्रहरीले कडाइ गरेको छ । खासगरि नौविसे–नागढुंगा क्षेत्रमा प्रहरी विशेष निगरानी गरेको छ । यस्तै अन्य मुख्य र साहयक नाकाहरुमा पनि प्रहरीको तैनाथी बढाएको महानागरीय प्रहरी प्रमुख पोखरेलले जानकारी दिए ।