रूपन्देहीमा जंगली च्याउ खाँदा एकै परिवारका ७ बिरामी

बुटवल– रूपन्देहीमा विषालु च्याउ खाएर एकै परिवारका ७ जना बिरामी भएका छन्।

बिरामी पर्नेमा गैडहवा गाउँपालिका–४, मिनमिनवाका ७० वर्षीया कैलाशी रैदास, ४५ वर्षीय बद्री, ३५ वर्षीया सरस्वती, १८ वर्षीया लक्ष्मी, १६ वर्षका रामानन्द, १४ वर्षीया ममता र १२ वर्षीया अनिशा रहेको जिल्ला प्रहरी कार्यालय, रूपन्देहीले जनाएको छ।

तीमध्ये ममता उपचारपछि घर फर्किसकेको र अन्यको उपचार भइरहेको प्रहरीले जनाएको छ। उपचार भइरहेका बिरामीको अवस्था सामान्य रहेको बताइएको छ।

भैंसी चराउन गएकी अनिशाले जंगलबाट ल्याएको च्याउ खाएर बिरामी परेका उनीहरू शुक्रबार राति १२ बजे भीम अस्पताल भर्ना भएका हुन्। उनीहरूमा पेट दुख्ने, वान्ता हुनेलगायत समस्या देखिएको थियो।