सचिवालय बैठकअघि प्रधानमन्त्रीले भेटे राष्ट्रपति

काठमाडौं- प्रधानमन्त्री केपी ओली नेकपा सचिवालय बैठक बस्नुअघि शीतल निवास पुगेर राष्ट्रपतिसँग भेट वार्ता गरेका छन्।उनीहरूबीच के विषयमा छलफल भयो भन्रेबारे केही खुलाइएकाे छैन।

सचिवालयको बैठक ४ बजेका लागि बोलाइएको थियो। नेताहरुबीच गुटगत छलफल तीव्र भइरहेपछि बैठक साढे ५ बजेका लागि सारिएको थियो।

पार्टी बैठकअगाडि प्रधानमन्त्रीले राष्ट्रपतिसँग भेट गर्नुलाई अर्थपूर्ण रुपमा हेरिएको छ।

शनिबारै प्रधानमन्त्री केपी ओलीले नेकपा उपाध्यक्ष वामदेव गाैतम लगायत अन्य नेतासँग छलफल गरेका थिए। संसद् सदस्यसमेत नरहेका उपाध्यक्ष वामदेव गौतमलाई प्रधानमन्त्री बनाउने प्रस्ताव गरेका ओली उनलाई आफ्नो पक्षमा पार्न सक्रिय छन्। सोही क्रममा सचिवालय बैठकभन्दा अगाडि उनले गौतमसँग भिन्नै छलफल गरेका हुन्।

प्रधानमन्त्री ओलीले १७ गते बसेको सचिवालय बैठकमा वामदेव गौतमलाई प्रधानमन्त्रीको प्रस्ताव गरेका थिए। उनको प्रस्तावमा अर्का अध्यक्ष पुष्पकमल दाहाल लगायत सचिवालयका बहुसंख्यक सदस्यहरूले समर्थन जनाएका छैनन्। तर अब प्रधानमन्त्री ओलीको विकल्प खाेज्नुपर्नेमा उनीहरू सहमत देखिएका थिए।