काठमाडौं- भारतको झुलाघाटबाट उद्धार गरी ल्याइएका एक नेपालीको बैतडीमा हिँड्दाहिँड्दै मृत्यु भएको छ।
बैतडीको पुर्चौंडी नगरपालिका–६ मनकालीका ६७ वर्षीय जुने लुहारको शनिबार बिहान ६ बजे क्वारेन्टिनमा लैजाँदै गर्दा मृत्यु भएको प्रहरीले
जनाएको छ। लकडाउन अघि उपचारका लागि भारतको पिथौरागढ गएका लुहार लकडाउनका कारण उतै थुनिएका थिए।
नाका खुलेपछि घर फर्किएका उनको हिड्दाहिड्दै अचानक मृत्यु भएको जिल्ला प्रहरी कार्यालय बैतडीका प्रहरी नायब उपरीक्षक (डीएसपी) डिल्लीराम पाण्डेले जानकारी दिए।
कोरोनाको कुनै लक्षण नदेखिए पनि मृतक लुहारको स्वाब परीक्षणका लागि धनगढी पठाइएको छ। उनीसँगै आएका अन्यलाई छुट्टै क्वारेन्टाइनमा राखिने भएको छ।
महाकाली पारि अलपत्र परेका २ हजार ६ सय नेपालीको उद्धार गरिएको थियो। लुहार पनि त्यसैमा थिए।