काठमाडौं- संसदीय समितिले प्रत्येक परिवारका कम्तीमा एकजना सदस्यको कोरोना भाइरस संक्रमण भए नभएको परीक्षण गर्न सरकारलाई र लकडाउन खुुकुलो पार्ने योजना ल्याउन सरकारलाइ निर्देशन दिएको छ।
राष्ट्रिय सभाअन्तर्गतको विधायन व्यवस्थापन समितिले शुक्रबार स्वास्थ्य तथा जनसंख्यामन्त्री भानुभक्त ढकाललाई कोरोना परीक्षणको दायरा बढाउन र लकडाउन खुकुलो पार्ने योजना ल्याउन निर्देशन दिएको हो।
कम्तीमा हरेक परिवारबाट एकजनाको नमुना छनोट गर्न, स्वास्थ्य सामग्री भण्डारणलाई सबै प्रदेश तथा स्थानीय तहमा व्यवस्थापन गर्न र राहत वितरण प्रक्रिया व्यवस्थित गर्न समितिले सरकारलाई निर्देशन दिएको छ।
समितिले कोरोना भाइरसले पारेको प्रभावको विवरण जानकारी गराउन पनि सरकारलाई निर्देशन दिइएको छ। लकडाउन खुकुलो पार्ने र पूर्ण रूपमा लकडाउनको अवस्था हटाउने योजना बनाएर समितिलाई जानकारी गराउन पनि समितिले निर्देशन दिएको छ।