बोर्ड अफ कन्ट्रोल फर क्रिकेट इन इन्डिया(बीसीसीआई)को अध्यक्ष पदमा नियुक्त हुँदा सौरभ गांगुलीले राष्ट्रिय खेलाडीको आयमा वृद्धि गर्ने बताएका थिए। तर, अहिले खेलाडीको आय मात्र होइन खेल जीवन नै अप्ठ्यारोमा परेको भारतीय सञ्चारमाध्यमले जनाइरहेका छन्।
नोबेल कोरोना भाइरस (कोभिड–१९) जोखिमका कारण खेल रोकिँदा खेलाडीको आर्थिक अवस्था पनि चौपट भएको छ। महामारीको समयलाई मध्यनजर गर्दै क्रिकेट सञ्चालन महाप्रबन्धक सबा करिमले बीसीसीआईले छिट्टै खेलाडीको आयबारे निणर्य गर्ने बताएका छन्। उनले बीसीसीआईले आर्थिक योजना ल्याउने बताउँदै यसले खेलाडीलाई सहयोग पुग्ने बताए।
‘२०२०–२१ को घरेलु सिजनको सुरुवात अगष्टमा दलीप ट्रफीबाट गर्ने योजना थियो। तर, कोरोना भाइरसका कारण यो प्रतियोगिता स्थगित गरिएको छ’, करीमले भने, ‘अहिले बोर्ड हेर अनि अघि बढको स्थितिमा छ। अब मे ३ मा सकिने लकडाउनपछि सरकारको सल्लाह लिएर काम गर्ने छौं।’
उनले थपे, ‘अहिलेसम्म हामीसँग कुनै ब्याक अप प्लान छैन्। हामी धेरै भन्दा धेरै खेल खेलाउन चाहान्छौं ताकी सिजन पनि लामो होस्। तर यो सबै लकडाउन सकिएपछि मात्र सम्भव छ।’