धनगढी– भारतको पिथौरागढस्थित क्वारेन्टाइनमा रहेका एक हजार पाँच सय नेपालीको उद्धार भइरहेको छ।
बैतडीको झुलाघाट र दार्चुलाको धार्चुला नाकाबाट ती नेपालीको उद्धार भइरहेको त्यहाँस्थित जिल्ला प्रशासन कार्यालयले जनाएका छन्।
जिल्ला प्रशासन कार्यालय, बैतडीका सूचना अधिकारी लोकेन्द्र सिंह ऐरीले झुलाघाट नाकाबाट तीन सय ७० जनाको उद्धार गरिसकेको र केहीको उद्धार जारी रहेको जानकारी दिए। उनका अनुसार झुलाघाट नाकाबाट झन्डै नौ सय र बाँकीको धार्चुला नाकाबाट उद्धार हुनेछ।
जिल्ला प्रशासन कार्यालय, दार्चुलाका सूचना अधिकारी टेक सिंह कुँवरले धार्चुला नाकाबाट दुई सय सर्वसाधारणको उद्धार भइसकेको जानकारी दिए।
उद्धार गरिएकाको कोरोना भाइरस रोग (कोभिड–१९) परीक्षण गरिने नेगीले बताए। “परीक्षण रिपोर्ट नेगेटिभ देखिए क्वारेन्टाइनमा र पोजेटिभ आए आइसोलेसनमा राखिनेछ,” उनले भने।
क्वारेन्टाइनमा राखिनेहरूको नियमित अनुगमन गरिने उनको भनाइ छ। उनका अनुसार बैतडीका प्रत्येक पालिकामा कम्तीमा सय बेड क्षमताका क्वारेन्टाइन छन्। तीमध्ये पुरचौंडी नगरपालिकामा तीन सय र डिलासैनी नगरपालिकामा दुई सय बेड क्षमताका क्वारेन्टाइन रहेको उनले जानकारी दिए।
नेगीका अनुसार ती नेपालीलाई २५ दिनअघि पिथौरागढका क्वारेन्टाइनमा राखिएको थियो।
उनका अनुसार क्वारेन्टाइनमा बैतडी, दार्चुला, बझाङ, डडेलधुरा, कैलाली, दैलेख र जाजरकोटका सर्वसाधारण रहेको नेगीले बताए।
यसअघि गत बुधबार बैतडी र दार्चुला तथा भारतको पिथौरागढका प्रमुख जिल्ला अधिकारीबीच क्वारेन्टाइनमा रहेका नेपालीलाई स्वदेश फर्काउने सहमति भएको थियो।