काठमाडौं – क्वारेन्टाइनमा बस्नेको संख्या प्रदेश ५ मा धेरै रहेको स्वास्थ्य तथा जनसंख्या मन्त्रालयले जानकारी दिएको छ। मन्त्रालयको नियमित पत्रकार सम्मेलनमा मन्त्रालयका प्रवक्ता विकास देवकोटाले क्वारेन्टाइनमा बस्नेको संख्या सबैभन्दा धेरै प्रदेश ५ मा र सबैभन्दा कम बागमती रहेको बताए।
क्वारेन्टाइनमा हाल २२ हजार ९९ जना रहेका छन्। उनीहरुमध्ये प्रदेश ५ मा १२ हजार १ सय ६४ र बागमती प्रदेशमा ३ सय ६१ जना क्वारेन्टाइनमा रहेका छन्। त्यस्तै प्रदेश १ मा २ हजार २ सय ८८, प्रदेश २ मा १ हजार ५ सय १२, गण्डकी प्रदेशमा ६ सय ७६, कर्णालीमा ३ हजार ७ सय ८९ र सुदूरपश्चिममा १ हजार ३ सय ९ जना क्वारेन्टाइनमा रहेका मन्त्रालयका प्रवक्ता देवकोटाले जानकारी दिए।
नेपालमा हालसम्म ५४ हजार ८ सय २६ जनामा कोरोना भाइरस परीक्षण गरिएको छ। पीसीआरबाट १० हजार ८ सय ७ र आरडीटीबाट ४४ हजार १९ जनामा कोरोना भाइरसको परीक्षण गरिएको देवकोटाले जानकारी दिए।
आरडीटीबाट प्रदेश १ मा ४ हजार ८ सय २८, प्रदेश २ मा ५ हजार २ सय ४९, बागमती प्रदेशमा ८ हजार १४, गण्डकी प्रदेशमा ४ हजार ९ सय ३६, प्रदेश ५ मा ५ हजार ३ सय २८, कर्णाली प्रदेशमा ५ हजार १ सय ८१ र सुदूरपश्चिममा १२ हजार २ सय ८३ जनामा कोरोना परीक्षण भएको छ।
हालसम्म आइसोलेसनमा १ सय ७ जना रहेका छन्। मोबाइल एपमा स्वपरीक्षण गरिएकामध्ये अहिलेसम्म ३ सय ९ जना ‘रेड जोन’ मा रहेका छन्। हालसम्म नेपालमा ५४ जना संक्रमित भएकोमा १६ जना निको भएर घर फर्किएका छन्। संक्रमितमध्ये धनगढीस्थित सेती प्रादेशिक अस्पतालमा १ जना, विरगञ्जको नारायणी उपक्षेत्रीय अस्पतालमा ५ जना, भरतपुर कोरोना अस्थायी अस्पतालमा १ जना र विराटनगरको कोसी अञ्चल अस्पतालमा ३१ जना उपचाररत छन्।