काठमाडौं- रेडियो नेपालका कार्यकारी निर्देशक सुरेशकुमार कार्कीलाई संचार चथा सूचना प्रविधि मन्त्रालयले दिनकै स्पष्टीकरण सोध्न थालेको छ।
मन्त्रालयले कार्कीलाई सोमबार र मंगलबार दुई दिन लगातार स्पष्टीकरण सोधेको हो।
सोमबार रेडियो नेपालको अन्तरसंवाद कार्यक्रममा पूर्व प्रधानमन्त्री डा. बाबुराम भट्टराईलाई बोलाएको विषयमा स्पष्टीकरण सोधेको मन्त्रालयले मंगलबार कार्य क्षमतामाथि प्रश्न उठाउँदै स्पष्टिकरण सोधेको हो।
आफूलाई मन्त्रालयले स्पष्टीकरण साेधेकाे पत्र कार्कीले फेसबुक मार्फत् सार्वजनिक गरेका छन्।
रेडियो नेपालको प्रत्यक्ष प्रसारण हुने बिहान साढे ६ बजेको अन्तर संवादमा डा. भट्टराईले सरकारविरुद्ध जातिय विद्वेष, घृणा उब्जाएको, सक्ता कब्जा, निरंकुश साशक र भष्मासुर जस्ता भ्रमपूर्ण र लाल्छनायुक्त शब्द प्रयोग गरेको भन्दै कार्कीलाई तीन दिनभित्र स्पष्टीकरण पेश गर्न भनेको छ।
सोमबारको मन्त्रीस्तरीय निर्णयले कार्कीलाई स्पष्टीकरण सोध्ने निर्णय गरेको पत्रमा उल्लेख छ।
यस्तै मन्त्रालयले गत चैत ९ गतेको मन्त्रिपरिषद् बैठकको निर्णयअनुसार भन्दै कार्कीलाई मंगलबार ३ बुँदे स्पष्टिकरण सोधेको छ।
मन्त्रालयको पत्रअनुसार कार्कीले कार्यकारी निर्देशक नियुक्त हुँदा सचिवसँग गरेको कार्य सम्पादन सम्झौतामा उल्लेख गरिएका सूचकांक अनुसार सन्तोषजनक प्रगति नगर्नु र रेडियोको वार्षिक कार्यक्रमहरु समयमा सम्पन्न गर्नु नसक्नुको कारण सोधिएको छ।
सात दिन भित्र पेश गर्न भनिएको उक्त स्पष्टिकरण पत्रमा रेडियो नेपालको ललितपुर खुमल्टारस्थित ट्रान्समिटिङ स्टेशनको ४२ रोपनी जग्गाको न्यूनतम् दर कायम गर्दा स्थानीय तहको भाडादर, सकारी निकायको भाडादर र प्रचलित बजार मूल्यको आधार नलिनुको कारण सोधिएको छ।
यस्तै स्पष्टिकरण पत्रमा रेडियो नेपाल र नेपाल टेलिभिजनको समष्टिगत सुधार प्रतिवेदन २०७५ मा उच्च व्यवस्थापनका सुधारका लागि सुझाव शीर्षकमा वर्तमान कार्यकारी निर्देशकको कार्यशैली हरेक दृष्टिले संस्थाको हितमा नरहेको भनी औँल्याइएको विषय उल्लेख गरिएको छ।