रोल्पामा क्वारेन्टाइनमा रहेका वृद्धको मृत्यु

सुर्खेत- रोल्पाको माडी गाउँपालिकाको क्वारेन्टाइनमा एक वृद्धको मृत्यु भएको छ। माडी गाउँपालिका-२ का ८२ वर्षीय तुलबहादुर परियारको सोमबार राति क्वारेन्टाइनमै मृत्यु भएको गाउँपालिका अध्यक्ष नन्दबहादुर पुनले जानकारी दिए।

परियार दमका बिरामी थिए। उपचारका लागि काठमाडौं गएका उनी केही दिनअघि छोराबुहारीसँगै गाउँ फर्किएका थिए। उनीसँगै ४५ जनालाई गाउँपालिकाले सञ्चालन गरेको भगवती आधारभूत विद्यालय मानिवाङको क्वारेन्टाइनमा राखेको थियो।

भक्तपुरस्थित कृष्णा इँट्टाभट्टामा मजदुरी गरेर फर्किएका ४५ जना नागरिकलाई क्वारेन्टाइनमा राखिएको छ। मृतक तुलबहादुरका छोरा मनप्रसाद परियारले नाइकेको काम गर्दै आएका छन्। 

कोरोना भाइरस परीक्षण गर्न मृतकको स्वाब संकलनका लागि रेउघा अस्पतालबाट डाक्टरको टोली गाउँ पुगिसकेको छ।