काठमाडौं- लकडाउनको समयमा विराटगरबाट काठमाडौं आएका यात्रुहरुलाई उतै फर्काइने भएको छ।
काठमाडौंमा मान्छे ल्याउने सरकारको नीति नभएको भन्दै प्रशासनले थानकोटमा करिव ११ घण्टादेखि अलपत्र यात्रुलाई विराटनगर फिर्ता पठाउने निर्णय गरेको हो।
काठमाडौंका प्रमुख जिल्ला अधिकारी जनकराज दाहालले समन्वयबिना नै आएकाले उनीहरुलाई विराटनगर नै फर्काउने निर्णय गरिएको जानकारी दिए।
बिरामीबाहेक अरुलाई लकडाउनको समयमा काठमाडौं ल्याउने नीति नभएकाले उनीहरुलाई विराटनगर नै फर्काउने निर्णय भएको दाहालले बताए।
काठमाडौंमा अलपत्र परेका आफ्नो क्षेत्रका नागरिकलाई लिन विराटनगर महानगरले आइतबार सातवटा बस पठाएको थियो। उक्त बसमा काठमाडौं आउन चाहने १ सय ६० जनालाई पनि पठाएको थियो। प्रहरीले उनीहरुलाई थानकोटमै रोकेको छ।
उनीहरु बिहान करिव ६ बजेतिर थानकोट आइपुगेका हुन्। गृह मन्त्रालयले लकडाउनलाई कडाई गर्न भन्दै सोमबारबाट यात्रु ओसार्ने कार्यमा कडाई गरेको छ।
अत्यावश्यक सवारी साधन र पासबाहेक अरु सवारी साधन चल्न नदिन गृह मन्त्रालयले सुरक्षा निकाय र जिल्ला प्रशासनलाई पत्ररिपत्र गरेको छ।
पछिल्लो समय विशेष गरी राजधानी काठमाडौंमा अलपत्र परेकाहरुलाई सम्बन्धित पालिकाहरुले बसको व्यवस्था गरेर यात्रु लैजाने गरिरहेका छन्।