जनकपुरधाम- वीरगन्जमा थप दुईजनामा कोरोना भाइरस पोजेटिभ देखिएको छ।
वीरगन्ज महानगरपालिका वडा नम्बर २ र ३ का दुई पुरुषमा पीसीआर परीक्षणका क्रममा पोजिटिभ देखिएको पर्साका सहायक प्रमुख जिल्ला अधिकारी ललित बस्नेतले जानकारी दिए।
बस्नेतका अनुसार दुवै जना यसअघि संक्रमण पुष्टि भएका छपकैयास्थित मस्जिदमा बस्दै आएका तीन भारतीय जमातीको सम्पर्कमा रहेका व्यक्ति हुन्।
संक्रमित दुई जना महानगर कार्यालयका सफाइ कर्मचारी वीरगन्ज–३ छपकैया बस्ने ४९ वर्षीय पुरुष र वीरगन्ज–२ बस्ने ५५ वर्षीय पुरुष रहेकाे बस्नेतले बताए। उनका अनुसार दुवैजनालाई उपचारका लागि वीरगन्ज अस्पतालमा भर्ना गरिएको छ।
चारजना संक्रमित नाेकाे भए
यसअघि वीरगन्जमा भर्ना भएका चारजना कोरोना संक्रमित डिस्चार्ज हुने भएका छन्। कोरोना पुष्टि भएका चारैजना निको भएपछि आजै डिस्चार्ज गर्न लागिएको नारायणी उपक्षेत्रीय अस्पताल वीरगन्जले जनाएको छ।
डिस्चार्ज हुन लागेकामा तीनजना भारतीय र एक नेपाली रहेको अस्पतालका मेसु मदन उपाध्यायले जानकारी दिए। दुईपटक लगातार गरिएको पीसीआर जाँचमा निगेटिभ नतिजा आएपछि उनीहरुलाई डिस्चार्ज गर्न लागिएको हो।
केही दिनअघि वीरगन्जका तीन र रौतहटको एकजना कोरोना संक्रमित पाइएपछि उपचारको लागि नारायणी उपक्षेत्रीय अस्पतालमा भर्ना गरिएको थियो।