काठमाडौं- भूकम्प गएको ५ वर्ष बितिसक्दा सम्म अझै ८४ हजार घर बन्न बाँकी छ। २०७२ वैशाख १२ गतेको विकाशकारी भूकम्पमा ७ लाख ८६ हजार निजी आवास क्षति भएका थिए। ८४ हजार घर भने निर्माण सुरु नै हुन सकेको छैन।
४ लाख ९४ हजार घर निर्माण भइसकेका र एक लाख ९० हजार घर निर्माणको चरणमा रहेको पुनर्निर्माण प्राधिकरणले जनाएको छ। क्षतिग्रस्त निजी घरको ८८ प्रतिशत निर्माण सम्पन्न भएको प्राधिकरणको दाबी छ।
पुनर्निर्माणमा ३ खर्ब ८१ अर्ब रुपैँयाँ खर्च भएको छ। सरकार तथा दातृ निकायबाट ३ खर्ब ९ अर्ब रुपैयाँ र गैरसरकारी संस्थामार्फत ७२ अर्ब रुपैयाँ खर्च भएको प्राधिकरणले जनाएको छ।
सरकारले प्राधिकरणमार्फत भूकम्पमा क्षति भएका निजी आवास बनाउन तीन लाख रुपैयाँ अनुदान दिएको छ। हालसम्म ५ लाख ६१ हजार सर्वसाधारण पुनर्निर्माणपछि अन्तिम किस्ताको भुक्तानी लिइसकेका छन्।
प्राधिकरणका अनुसार भूकम्पमा क्षतिग्रस्त ७ हजार ५५३ विद्यालयमध्ये ५ हजार ५९८ निर्माण सम्पन्न र १ हजार ४९२ निर्माणका क्रममा छन्।
यस्तै ९२० सम्पदामध्ये ४०२ वटा पुनर्निर्माण सम्पन्न भइसकेका छन् भने १४१ निर्माणाधीन छन्। एक हजार १९७ वटा स्वास्थ्य संस्थामध्ये ६६९ वटा निर्माण सम्पन्न र १४५ पुनर्निर्माणको चरणमा रहेको प्राधिकरणले जनाएको छ।