नेपालमा कोरोना संक्रमितको संख्या बिहिबारसम्म ४७ पुगेको छ भने उपचारपश्चात् निको हुनेको संख्या ९ पुगेको छ ।
सुदूरपश्चिमको सेती प्रादेशिक अस्पतालमा उपचाररत ४ जना, धौलागिरी अस्पतालका १ जना, शुक्रराज ट्रपिकल तथा सरुवारोग अस्पतालमा रहेका ३ जना तथा पाटन अस्पतालका २ जना संक्रमण मुक्त भएर घर फर्किएका छन् ।
नेपालका पहिलो कोरोना संंक्रमितलाई माघ ९ गते पुष्टि भएको थियो। उनी चीनको वुहान (कोरोना भाइरसको उद्गमस्थल) बाट आएका थिए । उनको टेकुस्थित शुक्रराज ट्रपिकल अस्पतालमा उपचार गराएर उनी माघमै डिस्चार्ज भए।
त्यस्तै दोस्रो संक्रमित १९ वर्षिया युवती पनि टेकु अस्पतालबाट निको भएर घर फर्किसकेकी छिन् । उनलाई १० चैतमा देखिएको थियो ।
कोरोनाका तेस्रो संक्रमित पनि टेकु अस्पतालमा उपचारत थिए । धादिङका ३२ वर्षीय पुरुष पनि आजै आजै टेकु अस्पतालबाट विदा भएका छन् ।
उता पाटन अस्पतालमा भर्ना भएका २ संक्रमितहरु पनि बिहिबार नै संक्रमण मुक्त भएर घर फर्किएका छन् । वैशाख २ गते काठमाडौं पेप्सीकोलास्थित सनसिटी अपार्टमेन्टका ८१ वर्षीया महिला र ५८ वर्षीय पुरुषमा संक्रमण देखिएको थियो ।
संक्रमण देखिएका २ जना पाटन अस्पतालमा उपचाररत थिए । योसँगै उपत्यकामा कोरोना संक्रमितको संख्या शून्य भएको छ ।