अध्यादेशबाट झस्किएको कांग्रेसले केन्द्रीय समिति बैठक बोलायो

काठमाडौं- प्रमुख प्रतिपक्षी दल नेपाली कांग्रेसले केन्द्रीय कार्यसमितिको बैठक डाकेको छ ।

कोरानाको महामारीका बेला सरकारले दल विभाजन गर्न सहज हुने र संवैधानिक परिषद्बाट बहुमतका आधारमा निर्णय गर्न सकिने विधेयक जारी गरेपछि झस्किएको कांग्रेसले बैशाख १७ गतेका लागि केन्द्रिय समितिको बैठक डाकेको हो ।

पार्टी केन्द्रीय कार्यालय सानेपामा बस्ने बैठकमा सरकारले सोमबार जारी गरेको अध्यादेश र कोरोना भाइरस सङ्क्रमण रोकथामका सम्बन्धमा भएका कार्य तथा पार्टीले गर्नसक्ने योगदानका बारेमा छलफल हुने काँग्रेस मुख्य सचिव कृष्णप्रसाद पौडेलले जानकारी दिए ।

कांग्रेसले अध्यादेश कुनै पनि हालतमा सरकारले फिर्ता लिनु पर्ने माग गर्दै आएको छ । प्रधानमन्त्री केपीशर्मा ओली लोकतन्त्र सिध्याउने खेलमा लागेको भन्दै सरकारी कदमको कांग्रेसले चर्को आलोचना गर्दै आएको छ ।

मंगलबार बसेको काँग्रेस पदाधिकारी बैठकले अध्यादेश फिर्ता नलिए आन्दोलनमा समेत जान पछि नपर्ने चेतावनी दिएको थियो । सोहि बैठकको निर्णयलाई बल पुर्याउने गरि कांग्रेसले केन्द्रीय कार्यसमितिको बैठकमा छलफल गर्न लागेको हो ।