कोरोना भाइरसको आशंका गरिएका केन्द्रीय कारागार त्रिपुरेश्वरका दुई जना नर्सको रिपोर्ट नेगेटिभ आएको छ । द्रुत परीक्षण (आरडीटी)मा एन्टीबडी देखिएपछि उनीहरुलाई सोमबार टेकुस्थित शुक्रराज ट्रपिकल तथा सरुवा रोग अस्पतालमा भर्ना गरिएको थियो ।
टेकुस्थित राष्ट्रिय जनस्वास्थ्य प्रयोगशालामा गरिएको पीसीआर परीक्षणमा कोरोना भाइरसको रिपोर्ट नेगेटिभ आएको टेकु अस्पतालका निर्देशक सागर राजभण्डारीले जानकारी दिए ।
कारागार अस्पतालमा गत सोमबार ४० जनामा गरिएको आरडीटी परीक्षणमा कोरोना पोजेटिभ देखिएपछि उनीहरुलाई सोमबार टेकुस्थित शुक्रराज अस्पतालको आइसोलेसन वार्डमा भर्ना गरिएको थियो ।
साथै धादिङका कोरोना संक्रमित युवा पनि निको भएका छन् । उनी कोरोना संक्रमणमुक्त भइसकेको र परिवारका सदस्य आएपछि डिस्चार्ज गरिने भण्डारीले बताए ।
युएईबाट आएका ती युवामा कोरोना भाइरस देखिएपछि १२ चैतमा टेकु अस्पताल भर्ना गरिएको थियो । अहिलेसम्म उनीसहित ६ जना कोरोना संक्रमित निको भइसकेका छन् ।