सीके राउत भन्छन् : गणतन्त्र र संघीयता समाप्त पार्न खाेजिँदैछ

काठमाडौं- जनमत पार्टीका अध्यक्ष डा. सीके राउतले सरकारले अध्यादेश ल्याएर संघीयता र गणतन्त्र समाप्त पार्ने षड्यन्त्र गरिरहेकाे आराेप लगाएका छन्। उनले यतिबेला अध्यादेश ल्याउनुको औचित्य नरहेको भन्दै सरकारको आलोचना गरे।

‘लकडाउनका बेला सरकारले राजनीतिक दल र संवैधानिक परिषद्सम्बन्धी अध्यादेश ल्याएर गणतन्त्र र संघीयता समाप्त पार्ने षड्यन्त्र गरेको हो’, राउतले नेपाल समयसित भने, ‘सर्वसाधारण घरमा बन्दी भएका बेला सरकारले फाइदा उठाएको छ।’

राजनीतिक दल विभाजन प्रक्रिया सामान्य भएको दाबी गर्दै उनले यो कदमले संघीयतालाई नै समाप्त पार्न सक्ने बताए।

‘सरकारको यो कदमले संघीयता र गणतन्त्रका लागि पुनः आन्दोलन गर्ने वातावरण बनाएको छ’, उनले प्रश्न गरे, ‘संघीयता र गणतन्त्रकै लागि कतिपटक आन्दोलन गर्ने?’