जनकपुरधाम– वीरगञ्ज महानगरपालिकाका मेयर विजय सरावगी प्रदेश सरकारसँग रुष्ट देखिएका छन् । आफ्नै पार्टीको नेतृत्वमा रहेको प्रदेश सरकारसँग मेयर सरावगी रुष्ट भएका हुन् ।
सरावगीले कोरोना नियन्त्रण र गरिब परिवारलाई राहत वितरण गर्न प्रदेश सरकारले सहयोग नगरेको असन्तुष्टि पोखेका छन् । साथै उनले संघीय सरकारले समेत कुनै समन्वय नगरेको आरोप लगाएका छन् ।
वीरगञ्जमा सोमबार पत्रकार सम्मेलन गरेर मेयर सरावगीले प्रदेश २ का मुख्यमन्त्री लालबाबु राउतले कोरोना नियन्त्रणको नाउँमा टेस्ट किट दिनुबाहेक अन्य कुनै प्रभावकारी कदम नचालेको आरोप लगाए ।
‘वीरगञ्जमा तीनजना कोरोना संक्रमित देखिएपछि जनकपुर पुगेर मुख्यमन्त्रीलाई भेटेर छुट्टै कोभिड अस्पताल खोल्न आग्रह गरेँ,’ उनले भने, ‘तर, उहाँले खासै चासो देखाउनु भएको छैन, र्यापिड टेस्ट किटबाहेक केही सहयोग हामीले पाएका छैनौं ।’ अहिलेसम्म २५ लाख दिनबाहेक प्रदेश र संघीय सरकारले केही नदिएको उनले बताए ।
वीरगञ्जमा पीसीआर सञ्चालनमा नआउनु दुर्भाग्यपूर्ण रहेको बताउँदै उनले तत्काल सञ्चालन गर्न माग गरे । मेयर सरावगीले वीरगंजस्थित गण्डक अस्पताललाई कोभिड अस्पताल घोषणा गरेर नारायणी अस्पताललाई तत्काल जनरल अस्पताल बनाउनुपर्नेमा जोड दिएका छन् ।
वीरगंज महानगरभित्र हालसम्म १ हजार २०९ जनाको र्यापिड टेस्ट र ३२ हजार ४६९ परिवारलाई राहत वितरण भइसकेको उनले जानकारी दिएका छन् ।