र्‍यापिड टेस्ट पोजेटिभ आएको मुगुका वृद्धको पीसीआर रिपोर्ट नेगेटिभ

मुगुमा डाइग्नोस्टिक टेस्ट रिपोर्ट पोजेटिभ आएका एक व्यक्तिको पीसीआर रिपोर्ट भने नेगेटिभ आएको छ ।

बैशाख ४ गते र्‍यापिड टेष्ट गर्दा सत्याड गाउँपालिका–५, का ५६ वर्षिय वृद्धको रिपोर्ट पोजेटिभ आएको थियो । तर स्वाब परीक्षण गर्दा नेगेटिभ देखिएको कर्णाली प्रदेश स्वास्थ्य निर्देशनालयका प्रयोगशाला संयोजक ओम आचार्यले जानकारी दिए ।

आइतबार राति ९ बजे स्वाव परीक्षण गर्दा पीसीआर रिपोर्ट नेगेटिभ आएको आचार्यले जनाए । ‘र्‍यापिड टेष्ट नेगेटिभ देखिएका कारण स्वाव आउनेवित्तिकै नमूना परीक्षण गरेका थियौँ,’ उनले भने ‘तर रिपोर्ट नेगेटिभ आयो, अव डराउनु पर्दैन ।’

र्‍यापिड टेष्ट रोग प्रतिरोधात्मक क्षमता मापन गर्ने प्रविधि भएको बताउँदै उनले कोरोना भाइरस नभई अन्य कारणले पनि र्‍यापिड टेष्टले पोजेटिभ देखाउने तर्क गरे । र्‍यापिड टेष्टले नेगेटिभ देखिएका व्यक्ति चैत १ गते रुपैडिहा नाका हुँदै चैत ७ गते गाउँ पुगेका थिए । र्‍यापिड टेष्टले पोजेटिभ देखाए पनि उनको स्वास्थ्य अवस्था सामान्य रहेको छ ।