जनकपुरधाम- जनकपुरमा पैसा फ्याँकेर फरार महिलाको तस्बिर प्रहरीले सार्वजनिक गरेको छ। जनकपुरधाम–४ महावीरचोकस्थित सडकमा शुक्रबार अपराह्न पैसा फ्याँकेर फरार दुई महिलाको तस्बिर प्रहरीले सार्वजनिक गरेको हो।
सीसीटीभी फुटेजबाट सार्वजनिक गरिएको तस्बिरमा एकजना महिलाले कपडाले मुख छोपेको देखिन्छ। एकजनाले पहेंलो र अर्कीले कालो रङको लुगा लगाएका छन्।
दुवै महिलाको खोजी भइरहेको जिल्ला प्रहरी कार्यालय धनुषाका प्रवक्ता डीएसपी रामेश्वर कार्कीले जानकारी दिए। ‘हामीले दुवै महिलाको तस्बिर सार्वजनिक गरेर खोजी कार्य तीव्र पारेका छौं। उनीहरु चाँडै नियन्त्रणमा आउनेछन्,’ कार्कीले भने ।
उनले कोरोना महामारी फैलिइरहेको मौका छोपेर उनीहरुले आमनागरिकबीच त्रास फैलाउन पैसा फ्याँकेको हुन सक्ने बताए।
प्रहरीले घटनास्थलबाट बरामद गरेको रुपैयाँको परीक्षण जनकपुरस्थित प्रादेशिक अस्पतालमा नहुने भएको छ। महिलाहरुले फ्याँकेको केही थान रुपैयाँ नियन्त्रणमा लिएर जाँचका लागि प्रादेशिक अस्पताल पठाइएको थियो।
तर, कागज कोरोना संक्रमित रहेको/नरहेको जाँच नेपालमा सम्भव नरहेको डीएसपी कार्कीले बताए।
‘प्रादेशिक अस्पताल जनकपुरमा रुपैयाँको जाँच नभएपछि अहिले हामीले आफ्नो जिम्मामा राखेका छौं,’ उनले भने, ‘जाँचको लागि बाहिर पठाउन समन्वय भइरहेको छ।’ दुई महिलाले पैसा फ्याँकेपछि सर्वसाधारण कोरोना फैलिने शंकामा त्रसित छन्।
याे पनि ः सडकमा पैसा फ्याँक्दै महिला भागेपछि जनकपुरका स्थानीय त्रसित