नेपालमा अहिलेसम्म १९ हजारभन्दा बढी व्यक्तिहरुमा कोरोना भाइरसको परीक्षण गरिएको छ।
नियमित पत्रकार सम्मेलनका क्रममा बिहीबार स्वास्थ्य तथा जनसंख्या मन्त्रालयका प्रवक्ता डा. विकास देवकोटाले रियल टाइम पोलिमरेज चेन्ज रियाक्सन (पीसीआर) र र्यापिड डाइग्नोष्टिक टेष्ट (आरडीटी) गरी दुवै विधिबाट अहिलेसम्म १९ हजार ४ सय ३२ जनाको परीक्षण गरिएको जानकारी दिए।
परीक्षण गरिएकामध्ये अहिलेसम्म १६ जनामा मात्र संक्रमण देखिएको छ। अहिले पीसीआरबाट देशभरिमा १३ वटा ठाउँमा र ६९ जिल्लामा आरडीटी माध्यमबाट परीक्षण भइरहेको छ। पीसीआरबाट ७ हजार २ सय ४० आरडीटीबाट १२ हजार १ सय ९२ जनाको परीक्षण गरिएको छ ।
आजैमात्र पीसीआरबाट ३ सय ६९ र आरडीटीबाट ३ हजार २ सय ६३ जनाको परीक्षण गरिएको छ।
अहिलेसम्म आइसोलेसनमा १ सय ३ जना रहेका छन्। तीमध्ये ८ जना काठमाडौँ र ९५ जना उपत्यका बाहिर छन्। मोबाइल एपमा स्वपरीक्षण गरिएकामध्ये अहिलेसम्म २ सय ४७ जना ‘रेड जोन’मा रहेका छन्।
यसैगरी प्रवक्ता डा. देवकोटाले आज वीरगञ्जको छप्कैयामा ४ सय जनाको र्यापिड टेस्ट गरिएको र सबैको नतिजा नेगेटिभ आएको जानकारी दिए ।