लकडाउन भोलि सकिँदै, थप्ने–नथप्ने निर्णय आज हुने

कोरोना भाइरसका कारण देशभर लागू भएको बन्दाबन्दी (लकडाउन) भोलि (बुधबार) देखि सकिँदैछ। पछिल्लोपटक चैच २५ गते थपिएको एक साताको समय भोलिबाट सकिनेछ।

पहिलोपटक चैत ११ गतेदेखि एक साताका लागि लागू भएको लकडाउन पटकपटक गरी वैशाख ३ गतेसम्मका लागि लागू भएको थियो।

पछिल्ला केही दिनयता कोरोनाका नयाँ संक्रमित देखा परिरहेकाले लकडाउनको समय अझै थपिनसक्ने सम्भावना पनि छ।

सोमबारसम्ममा कोरोना संक्रमितको संख्या १४ पुगेको छ भने काठमाडौंको एक अपार्टमेन्टमा बस्ने एकै परिवारका तीनजनामा पहिलो परीक्षणमा रिपोर्ट पोजेटिभ आएपछि पुनः परीक्षण गरिँदैछ। सरकारले पछिल्लो साता परीक्षणको दायरा फराकिलो बनाएको छ।

आज बिहान ११ बजे बस्ने मन्त्रिपरिषेद बैठकले लकडाउन थप्ने वा अन्त्य गर्ने निर्णय गर्नेछ। अझै एक साता थपिए लकडाउनको अवधि एक महिना पुग्नेछ।