जनकपुरधाम- कोरोना महामारीविरुद्ध रोकथाम, नियन्त्रण तथा उपचारमा खटिने स्वास्थ्यकर्मी र कर्मचारीको ज्यान गए परिवारले एकमुष्ट ५० लाख रुपैयाँ राहत पाउने भएका छन्।
प्रदेश २ सरकारकाे मन्त्रिपरिषद्को शुक्रबार बसेको बैठकले कोरोना उपचारमा संलग्न कर्मचारी, स्वास्थ्यकर्मी, एम्बुलेन्स चालक, सहयोगी स्वास्थ्यकर्मी वा अन्य कर्मचारी तथा पदाधिकारीलाई कोरोना संक्रमण भई मृत्यु भए पीडित परिवारलाई ५० लाख राहतस्वरुप उपलब्ध गराउने निर्णय गरेको हो ।
लकडाउनका कारण किसान पीडित भएको भन्दै बैंक, वित्तीय संस्था वा सहकारीबाट लिएको ऋणको ४ महिनाको ब्याज प्रदेश सरकारले तिरिदिने निर्णय बैठकले गरेको छ।
बैठकले कृषि कार्यका लागि लिएको ५ लाखसम्म ऋणमा अधिकतम १२ प्रतिशतसम्मको ४ महिनाको ब्याज प्रदेश सरकारले तिर्ने निर्णय गरेको हो।
पाँच लाखदेखि १५ लाखसम्मको ऋणमा १२ प्रतिशत सम्मको ब्याजदरमा ५० प्रतिशत, १५ लाखदेखि ३० लाखसम्मको ऋणमा ४० प्रतिशत र ३० लाखभन्दा बढीको ऋणमा कृषि सहकारी तथा भूमि व्यवस्था मन्त्रालयको सिफारिसमा ब्याज तिरिदिने निर्णय गरेको सरकारका प्रवक्ता एवं आन्तरिक मामिला तथा कानुनमन्त्री ज्ञानेन्द्रकुमार यादवले जानकारी दिए।
सबाहेक दूध, फलफूल, तरकारी, कुखुरा तथा माछामा राहत उपलब्ध गराउने निर्णय प्रदेश सरकारले गरेको छ।