बाग्लुङ – कोभिड–१९ को जोखिम न्यूनीकरण गर्न म्याग्दी र बाग्लुङको सीमानामा कडाइ गरिएको छ ।
सिमानामा पर्ने म्याग्दीको मङ्गला गाउँपालिका–५ का वडाध्यक्ष भुपेन्द्र खत्री र बाग्लुङको ताराखोला गाउँपालिका–४ का वडाध्यक्ष जीतबहादुर खत्रीलगायत स्थानीय जनप्रतिनिधिको संयुक्त बैठकले सीमाबाट आवतजावत गरेको पाइएमा रु पाँच हजार जरिवानासहित १४ दिनसम्म क्वारेन्टिनमा राख्ने निर्णय गरेको हो।
मङ्गला र ताराखोला गाउँपालिकाले दुई वटै स्थानीय तह जोड्ने देउरालीको सिमाना आवतजावत गर्नेलाई पाँच हजार जरिवाना गर्ने निर्णय गरिएको वडाअध्यक्ष खत्रीले जानकारी दिए।
बाग्लुङका विभिन्न नाकाबाट पैदल यात्रामार्फत म्याग्दी प्रवेश भइरहेको गुनासोपछि अनुगमन र निगरानी थालिएको जनाइएको छ। रासस