भैरहवा– प्रदेश नम्बर ५ को सुविधासम्पन्न कोरोना विशेष उपचार अस्पताल भैरहवामा निर्माण भइरहेको छ ।
रुपन्देही जिल्लाको सबैभन्दा पुरानो अस्पताल भीम अस्पताल भैरहवामा कोरोना भाइरस पोजेटिभ देखिएका बिरामीलाई उपचार गर्नेगरी उपकरणहरु जोड्ने काम भइरहेको अस्पतालका सूचना अधिकारी गोपाल उपाध्यायले बताए ।
उक्त अस्पतालमा कोरोना लागेका विरामीको लागि विशेष उपचार कक्ष बनाइँदै छ । तीनवटा भेन्टिलेटरसहित ५ बेड आईसीयू रहेको उक्त अस्पतालमा जम्मा ३५ बेड रहनेछन् ।
कोरोना विशेष अस्पताल छिट्टै सञ्चालनमा ल्याउन प्रदेश सरकारका सामजिक विकास मन्त्री सुदर्शन बराल लागिपरेका छन्। उनी दैनिक २ पटक अस्पताल निर्माण कार्यको निरीक्षणमा आउने गरेका छन् ।
कोरोना विशेष उपचार अस्पताल आगामी हप्तासम्ममा सञ्चालनमा आउने भीम अस्पताल भैरहवाका मेडिकल सुपरिटेन्डेन्ट डा. नविन दर्नालले बताए । उनले भने, ‘हामीले रातदिन लगाएर काम गराइरहेका छौं । अहिलेसम्म भौतिक पूर्वाधारको काम सम्पन्न भइसकेको छ । उपकरणहरु जडान हुँदैछन् । थप जनशक्ति व्यवस्थापनको लागि सूचना निकालिसकेका छौं । हप्ता दिनभित्रै पूर्ण तयार भइसक्छ ।’
कोरोना विशेष उपचार अस्पतालको लागि ६ जना विशेषज्ञ चिकित्सक, १० जना मेडिकल अधिकृत र १६ जना स्टाफ नर्स माग गरिएको छ । उक्त अस्पतालमा अहिले ८ जना चिकित्सक कार्यरत छन् ।
तीन दिन अगाडि भैरहवामै स्वाब परीक्षण गर्ने प्रयोगशाला गहुँबाली अनुसन्धान केन्द्रमा सञ्चालनमा आइसकेको छ ।