लकडाउनको समयमा पनि बान्नीकी चैतली मेला सञ्चालन गरेको आरोपमा प्रहरीले बझाङमा ४ जना वडाध्यक्षसहित ९ जनालाई पक्राउ गरेको छ।
पक्राउ पर्नेमा छविसपाथीभेरा गाउँपालिका वडा नम्बर २ का वडाध्यक्ष विकास अयडी, ३ का वडाध्यक्ष केशवराज जोशी, ४ का अध्यक्ष अमर थापा र ५ का वडाध्यक्ष लोकेन्द्र ठगुन्ना रहेको प्रहरीले जनाएको छ।
उनीहरुलाई बुधबार बेलुकी पक्राउ गरिएको र जिप्रकाको हिरासतमा राखिएको जिल्ला प्रहरी कार्यालयका प्रहरी निरीक्षक नेत्र बोहराले जानकारी दिए। बोहोराका अनुसार पक्राउ पर्ने अन्यमा मेला व्यवस्थापन गरिरहेका बान्नी मष्टा मन्दिर संरक्षण समिति कोषाध्यक्ष राजेन्द्रबहादुर सिंह, बान्नी मष्टाका पुजारी नृपराज जोशी र जयकृष्ण जोशी छन् ।
यस्तै बान्नी मष्टा मन्दिरका फूलपाती सेवक डम्मर धामी, मन्दिरका रजवार इन्द्रबहादुर सिंह पनि पक्राउ परेका छन्।
वडाध्यक्षहरुले बान्नी मेलामा मानिसहरुको उपस्थिति रोक्न गाउँपालिकाले प्रयास गर्दागर्दै पनि स्थानीय स्वःस्फूर्त भेला भएको बताएका छन्।
प्रहरीले गाउँपालिकाका अध्यक्ष अक्कलबहादुर धामी र उपाध्यक्ष राधिका रतालाको पनि खोजिकार्य भैरहेको जनाएको छ।