भैरहवा– ‘केही समस्या छ कि ? खानपिन कस्तो छ ? स्वास्थ्य अवस्था कस्तो छ ?’ भैरहवास्थित नीमा प्रतिमान प्राविधिक शिक्षालयमा रहेका भारतीय नागरिकहरुसँग हिन्दी भाषामै जिज्ञासा राख्दै थिए, सिद्धार्थनगर नगरपालिका भैरहवाका मेयर हरिप्रसाद अधिकारी ।
उनको प्रश्न सकिन नपाउँदै क्वारेन्टाइनमा बसिरहेकाहरुले एकै स्वरमा भने, ‘खानबस्न त घरमा भन्दा राम्रो छ । केही समस्या छैन । तर हामी कहिले घर जान पाउँछौं । घरका मान्छे आत्तिएका होलान् ।’
दिनको एकपटक क्वारेन्टाइन स्थलमा पुग्ने गरेका नगर प्रमुख अधिकारीले क्वारेन्टाइनमा बस्नेहरुमा मानसिक तनाव नहोस्, उनीहरुमा आत्मविश्वास बढोस् भनेर आफू नियमित रुपमा क्वारेन्टाइनमा जाने गरेको बताए ।
उनले भने, ‘मैले केही नगरे पनि नमस्कार भनेर सबैलाई अभिवादन गरेँ भने पनि कोठाभित्र गुम्सिएर बसेकाहरुलाई हौसला मिल्छ । आत्मविश्वास बढ्छ । यसले कोरोनाविरुद्धको रोग प्रतिरोधात्मक शक्ति बढाउन पनि मद्दत मिल्छ ।’
नगर प्रमुख भेट्न आएपछि क्वारेन्टाइनमा बसेका दीपक कुमारले भने, ‘सुविधाको हिसाबले घरमा भन्दा बढी छ । दुई पटक नास्ता, दुई पटक खाना । दिनैजसो मेयरसाब आइराख्नुहुन्छ । सन्चो बिसन्चो सोध्दा खुसी लाग्छ ।’
दीपक भारतको छपडा बिहार मसरथाना निवासी हुन् । उनी गुरबनियाको श्याम प्लाइमा काम गर्छन् । उनीसँगै बिहारका १३ जना उक्त क्वारेन्टाइनमा रहेका छन् ।
यसैगरी पोखरामा फलफूल व्यापार गर्ने बिज्रेश प्रजापति भारतको भैया फरिन्दामा रहेको आफ्नो घर जान हिँडेका थिए । तर लकडाउनका कारण उनी प्रशासन र नेपाल प्रहरीको सहयोगमा नीमा प्रतिमानमा बनाइएको क्वारेन्टाइनमा आइपुगेका छन् ।
तानसेनबाट भारतको कोलही गुडचीया जान हिँडेका उमेश ठाकुर पनि परिवारसहित क्वारेन्टाइनमा बस्दा खासै नरमाइलो नभएको बताउँछन् । ‘घर जान पाइएन, त्यो अलग कुरा भयो । तर उता पुगेको भए पनि त्यतिकै बस्न पथ्र्यो । यता पनि त्यतिकै बसिएको छ । ठीकै छ ।’
सिद्धार्थनगर नगरपालिकाको व्यवस्थापनमा नीमा प्रतिमान प्राविधिक शिक्षालयमा १५५ जना भारतीय मजदूरलाई राखिएको छ । यसैगरी शैक्षिक तालिम केन्द्र बसडिलवामा ४९ जनालाई राखिएको छ ।
दुवै क्वारेन्टाइनको सुरक्षा नेपाली सेनाले गरिरहेको छ भने आवश्यक प्रबन्ध नगरपालिकाले गरिरहेको छ । क्वारेन्टाइनको अवस्था बुझ्न नगर प्रमुख अधिकारी पुगिरहन्छन्। नगर उपप्रमुख उमा काफ्ले, प्रदेश सभा सदस्य सन्तोष पाण्डे, नगरका अधिकृतहरु पनि क्वारेन्टाइन पुग्ने गरेका छन् ।
सिद्धार्थनगर नगरपालिकाले दैनिक २ पटक नास्ता र बिहान साँझ खानाको व्यवस्था सहित व्यवस्थित ढंगले कोठाहरुमा राखेको सिद्धार्थनगरका वरिष्ठ अधिकृत गणेश क्षेत्रीले बताए । क्वारेन्टाइनमा बसेकाहरुको स्वास्थ्य अवस्था नियमित रुपमा जाँच गर्न नगरको स्वास्थ्य शाखाकोे टोली खटिएको छ ।