काठमाडौं- प्रमुख प्रतिपक्षी दल नेपाली कांग्रेसका सभापति शेरबहादुर देउवाले कोरोना भाइरसको संक्रमणबारे पूर्व प्रधानमन्त्रीहरुसँग टेलिफोनमा छलफल गरेका छन्।
पूर्व प्रधानमन्त्रीसमेत रहेका देउवाले कोरोना संक्रमणबाट मुलुकलाई जोगाउन के कस्ता कामहरु गर्न सकिन्छ र राजनीतिक रुपमा कसरी हातेमालो गर्न सकिन्छ भन्नेबारे पूर्व प्रधानमन्त्रीहरुसँग छलफल गरेका हुन्।
देउवाले आइतबार पूर्व प्रधानमन्त्रीहरु लोकेन्द्रबहादुर चन्द, पुष्पकमल दहाल, माधव नेपाल, झलनाथ खनाल, बाबुराम भट्टराई तथा मन्त्रिपरिषद्का पूर्व अध्यक्ष खिलराज रेग्मीसँग संवाद गरेका हुन्।
संवादमा मुलुकमा उत्पन्न संकटबाट नेपाल र नेपालीलाई जोगाउन एक्यवद्ध भएर अघि बढ्न देउवाले अपिल गरेको उनको सचिवालयले जनाएको छ।
कांग्रेस सभापति देउवाले यसअघि आफ्नो पार्टी सरकारलाई पूर्ण रुपमा सहयोग गर्न तयार रहेको स्पष्ट पार्दै सरकारका कदमलाई साथ दिन नागरिकहरुलाई अपिल गरेका थिए।