विहीबार, साउन २२, २०७७

समाचार

नेपालमा एक महिनामा ४२ गुणाले बढ्यो कोराना संक्रमण, अझै फैलिने विज्ञको चेतावनी

1590244290corona_3.jpg

काठमाडौं- नेपालमा पछिल्लो एक महिनामा कोरोना संक्रमणदर ४२ गुणाले बढेको छ ।

गत वैशाख २० गते जम्मा ४३ जना संक्रमित रहेकोमा जेठ २० गतेसम्म आइपुग्दा संक्रमितको संख्या १ हजार ८११ पुगेको छ। त्यस्तै संक्रमण ६० जिल्लामा पुगिसकेको छ ।

जेठ १९ गते सोमबार एकै दिनमा २३९ जना संक्रमित थपिए भने एक दिनअघि जेठ १८ गते आइतबार १७१, शनिबार १८९, शुक्रबार १७०, बिहीबार १५६, बुधबार ११४ र मंगलबार ९० जनामा संक्रमण पुष्टि भएको छ ।

एक महिनाअघि वैशाख २० गते ४३ जना संक्रमित रहेकोमा त्यसयता विस्तारै बढेको संक्रमण दर वैशाख ३० गते आइपुग्दा २१७ पुगेको थियो । सो दिन एकैपल्ट ८३ जनामा संक्रमण पुष्टि भएको थियो । त्यसयता लगातार बढेको संक्रमण दरले हरेक दिन संक्रमितको संख्यामा नयाँ रेकर्ड राख्दै आएको छ ।

जेठ महिना लागेपछिको १९ दिनमा मात्रै १ हजार ५६८ जनामा संक्रमण पुष्टि भएको छ । लकडाउनपछि एक लाख बढि नेपाली भारतबाट आएसँगै नेपालमा संक्रमण दर ह्वात्तै बढेको छ ।

भारतबाट आएकालाई व्यस्थित तरिकाले नराखे संक्रमण झनै भयावह हुनसक्ने जनस्वास्थ्यविद् डा बाबुराम मरासिनी बताउँछन् । उनी भन्छन्– 'स्वदेश फर्किन चाहनेलाई ल्याउनु राम्रो भए पनि सीमामा उनीहरुको जाँच र क्वारेन्टिनको उचित व्यवस्था नहुँदा निम्तिने भयावह अवस्थाप्रति सरकार गम्भीर बन्नु पर्छ ।'

सीमा व्यवस्थित बनाउने र भारतबाट आउनेलाई गतिलो व्यस्थापन नगर्ने हो भने अर्को महिना दशौं गुणाले संक्रमण फैलिन सक्ने उनको चेतावनी छ ।

अर्का जनस्वास्थ्यविद् डा शरद वन्त संक्रमण फैलिन नदिन सरकारले विदेशबाट आएकालाई व्यस्थित तरिकाले क्वारेन्टिनमा राख्ने र परीक्षणको दायरा अझै बढाउनु पर्ने बताउँछन् । उनका अनुसार जति धेरै परीक्षण भयो संक्रमण फैलिन नदिन उतिनै सहयोग हुनेछ ।

नेपालमा मंगलबार बिहानसम्ममा १ हजार ८११ जनामा कोरोना पुष्टि भएको छ भने ७१ हजार ९०३ जनामा परीक्षण गरिएको छ । ८ जनाको कोरोनाकै कारण मृत्यु हुँदा २२१ जना निको भएर घर फर्किएका छन् ।

प्रतिक्रिया दिनुहोस्