भैरहवा - रुपन्देहीको मर्चवार सीमादेखि करिब ७ किलोमिटर दूरीमा रहेको भारतीय गाउँ कोल्हुइमा कोरोना भाइरसको संक्रमण फैलिएपछि रुपन्देहीमा त्रासको वातावरण सिर्जना भएको छ।
मर्चवारी गाउँपालिकाबाट लकडाउनको अवधिमा पनि दैनिक ३०/३५ साइकलयात्री खैराको बाटो हुँदै कोल्हुई आउनेजाने गर्दछन्। खैराबाट कोल्हुई जम्मा ७ किलोमिटर टाढा मात्रै छ। भारतको उक्त क्षेत्रबाट हरियो तरकारी लिएर दैनिक दर्जनौं साइकल सीमावर्ति नेपाली शहर भैरहवा, बुटवल, लुम्बिनीसम्म पुग्ने गरेका छन्। तरकारी बेच्नेहरु टोलटोलमा छिर्ने भएकाले संक्रमण फैलाउने त होइनन् भन्ने त्रास स्थानीयमा सिर्जना भएको छ।
यता, भारतबाट आउने तरकारी व्यापारीहरुले संक्रमण फैलाउन सक्ने भन्दै दुईदिन अघि तिलोत्तमा नगरपालिकाले भारतीय तरकारी नगर भित्र प्रवेशमा प्रतिबन्ध नै लगाएको थियो।
भारतीय मिडीयाका अनुसार उक्त ठाउँमा हालसम्म ६ जनामा कोरोना पोजिटिभ भएको पुष्टि भइसकेको छ।