जनकपुरधाम - जनकपुरस्थित मारवाडी सेवा समितिले ‘लकडाउन’ का कारण समस्यामा परेका गरिब तथा विपन्न परिवारलाई खाद्यान्न सहयोग गरेको छ। दैनिक मजदुरी र ज्यालादारी गरी जीवनयापन गर्दै आइरहेका गरिब तथा विपन्न परिवारलाई शनिबार खाद्यान्नलगायतका सामग्री सहयोग गरेको गरिएको हो।
जनकपुरधाम उपमहानगरपालिका–१२ कुवामा दलित समुदायका ६० घरधुरीमा खाद्यान्न वितरण गरिएको समितिका अध्यक्ष ललित बजाजले जानकारी दिए। अध्यक्ष बजाजका अनुसार प्रत्येक परिवारलाई पाँच केजी चामल, तीन केजी आलु, दाल, सोयाबिन, नुन, चाउचाउ, विस्कुटलगायतको खाद्यान्न सामग्री वितरण गरिएको छ।
यसैगरी समितिले धनुषाको खजुरी गाउँपालिकामा समेत शनिबारै खाद्यान्न वितरण गर्ने समितिका सल्लाहकार निर्मल चौधरीले जानकारी दिए। समितिले खजुरीका गरिब तथा विपन्न परिवारमा समेत खाद्यान्न वितरण गर्ने उनले बताए।
कोरोना संक्रमण रोकथाम गर्न सरकारले ‘लकडाउन’ लागू गरेपछि दैनिक ज्यालादारी र मजदुरी गरेर जीवनयापन गरिरहेकाहरु समस्यामा परेकोले मारवाडी सेवा समितिले राहतस्वरुप खाद्यान्न वितरण गरेको चौधरीको भनाइ छ।
‘लकडाउन’ लम्बिँदा मजदुर तथा गरिबहरु समस्यामा परेपछि विभिन्न संघसंस्थाहरुले निजीस्तरमा खाद्यान्न, निःशुल्क खाना, साबुन, मास्क वितरण गर्दै आइरहेका छन्।