प्रादेशिक अस्पतालका स्वास्थ्यकर्मीलाई रेनकोट नै पीपीई

जनकपुरधाम– कोरोना भाइरसको संक्रमणलाई अहिले विश्वभर नै महामारीको रुपमा लिइएको छ । नेपालमा समेत केहीमा कोरोना पोजेटिभ देखिसकिएको छ । कोरोना संक्रमणको सम्भावित खतरालाई मध्यनजर गरी सरकारले मुलुकभर ‘लकडाउन’ गरेको छ ।

कोरोना संक्रमणको भय आमनागरिकलाई मात्र नभएर सबैभन्दा अगाडि मोर्चामा खटिने डाक्टर तथा स्वास्थ्यकर्मीहरुमा पनि उत्तिकै छ । संक्रमणकै भयले कतिपय अस्पताल तथा डाक्टरहरुले बिरामी जाँच्नसमेत छोडिसकेको गुनासाहरु पनि पर्याप्त आइरहेको छ । अस्पतालका साथै डाक्टरहरु आफ्नो पेशागत धर्म निर्वाह गर्न पछि हटेको आरोप लागिरहेको छ ।

प्रदेश २ का मुख्यमन्त्री लालबाबु राउतले बिरामीको उपचार नगर्ने अस्पताल तथा चिकित्सकहरुलाई कारबाही गर्ने चेतावनी नै दिएका छन् । यहाँसम्म कि आन्तरिक मामिला तथा कानुन मन्त्रालयले बिरामी नजाँच्ने अस्पताललाई कारबाहीको दायरामा ल्याउन प्रदेशस्थित सबै जिल्ला प्रशासन कार्यालयहरुलाई परिपत्र नै गरिसकेको छ ।

कोरोना संक्रमण फैलिएपछि जनकपुरस्थित प्रादेशिक अस्पतालले आकस्मिकबाहेक अन्य सम्पूर्ण सेवा बन्द गरेर ज्वरोको मात्र जाँच गरिरहेको छ । गत आइतबारदेखि प्रादेशिक अस्पतालले ‘फिभर क्लिनिक’ मात्र सञ्चालन गरेको छ ।

तर, ‘फिभर क्लिनिक’ मा खटिएका चिकित्सक तथा स्वास्थ्यकर्मीहरुका लागि पर्सनल प्रोटेक्टिभ इक्युपमेन्ट (पीपीई) नै छैन। उनीहरुका लागि रेनकोट नै पीपीई भएको छ ।

विहिबार प्रादेशिक अस्पतालमा डाक्टरहरु ज्वरोका बिरामीहरुको चेकजाँच गरिरहेका थिए । डाक्टरका सहयोगी स्वास्थ्यकर्मीहरु कोठा बाहिर बिरामीहरुको व्यवस्थापनमा व्यस्त देखिन्थे ।

न बिरामी जाँच्ने डाक्टरले पीपीई लगाएका थिए न त उनका सहयोगीहरुले नै । बिरामी जाँच गरिरहेका डाक्टर मनिष पाण्डेयको हातमा पञ्जा र अनुहारमा सामान्य मास्कमात्र थियो।

यसैगरी बिरामी व्यवस्थापन गर्न खटिएका अन्य स्वास्थ्यकर्मीहरुले रेनकोट लगाएका थिए । अस्पतालले पीपीई उपलब्ध नगराएपछि रेनकोट नै लगाएर ड्युटीमा खटिएको उनीहरुले बताए ।

भर क्लिनिकका संयोजक लालबाबु अन्सारीले पटकपटक माग गरेपनि अस्पतालले पीपीई र मास्क उपलब्ध नगराएपछि बाध्य भएर रेनकोट लगाएर खटिनु परेको बताए ।

‘जोखिम बढ्दो छ, अस्पतालले पीपीई दिन सकेको छैन,’ अन्सारीले भने, ‘बाध्यतावश हामीलाई रेनकोट प्रयोग गर्नुपरेको छ ।’ संघीय सरकारले पीपीई पठाएको सुनेपनि हालसम्म आफूहरुलाई उपलब्ध हुन नसकेको उनले बताए ।

‘ज्वरो लागेका बिरामीहरु जाँच गराउन अस्पताल आइरहेका छन्, कोरोना संक्रमणको जोखिम र त्रास छँदैछ, तर, हामीले सुरक्षित मास्कसमेत पाउन सकेका छैनौं,’ अन्सारीले भने,‘कपडाको सामान्यमास्क प्रयोग गरेर जेनतेन काम गर्नु परेको छ ।’

प्रदेश सरकारको सामाजिक विकास मन्त्रालयका एक उच्चपदस्थ कर्मचारीका अनुसार संघीय सरकारले प्रदेश २ को लागि एक हजार थान पीपीई, मास्कलगायतका आवश्यक सुरक्षा सामग्री पठाएको छ ।

तीन दिनअघि ती सामग्रीहरु आइपुगे पनि प्रादेशिक अस्पतालका चिकित्सक एवं स्वास्थ्यकर्मीहरुले हालसम्म पाउन सकेका छैनन । सामाजिक विकास मन्त्रालयका ती कर्मचारीले सबै चिकित्सक एवं स्वास्थ्यकर्मीहरुलाई पीपीई आवश्यक नरहेको बताए । कोरोना शंकास्पद बिरामीको उपचारमा खटिएका चिकित्सक एवं स्वास्थ्यकर्मीहरुलाई पीपीई उपलब्ध गराइने उनको भनाइ छ ।