जनकपुरधाम– अटोमोबाइल डिलर्स एशोसिएसन जनकपुरले गरीब तथा विपन्न परिवारलाई खाद्यान्नलागायतका सामग्री सहयोग गरेको छ । कोरोना संक्रमणलाई मध्यनजर गरी ‘लकडाउन’ को अवधि थपिएपछि समस्यामा परेका १५० गरीब तथा विपन्न घरधुरीलाई एशोसिएसनले सहयोग गरेको हो ।
एशोसिएसनले दैनिक मजदुरी र ज्यालादारी गरी जीवनयापन गरिरहेका जनकपुरधाम उपमहानगरपालिका–७ का दलित समुदायलाई राहत सामग्री वितरण गरेको छ ।
‘लकडाउन’ ले दैनिक मजदुरी र ज्यालादारी गरेर गुजारा गरिरहेका १५० परिवारलाई एशोसिएनले चामल, दाल, आलु, प्याज, नुन, सोयाबिन, साबुनलगायतका खाद्यान्न सामग्री राहतस्वरुप सहयोग गरेको एशोसिएसनका अध्यक्ष प्रमोद साहले बताए ।
विहिबार वडा नम्बर ७ का अध्यक्ष जानकीराम साहको पहलमा गरीब तथा विपन्नहरुलाई राहत वितरण गरिएको र अन्य वडामा आवश्यक भए त्यसको लागि पनि आफूहरु तयार रहेको एशोसिएसनका अध्यक्ष साहले बताए ।
‘लकडाउन’ लागु भएयता जनकपुरस्थित विभिन्न संघसंस्थाहरुले गरीब तथा विपन्न परिवारलाई खाद्यान्न, खाना, खाजा निःशुल्क सहयोग गरिरहेका छन् । ती संघसंस्थाहरुले विभिन्न वडाहरुमा पुगेर ‘लकडाउन’ का कारण समस्यामा रहेका गरीब तथा विपन्नहरुको घरसम्म पुगेर राहत पुर्याउने काम गरिरहेका छन् ।